Shillong, Nohprah 15
Ka ïingbishar Meghalaya High Court ka la bthah ïa ka Sorkar Jylla ba kan pynlong ïa ka Weigh-bridge ha Ratacherra, East Jaiñtia Hills kaba treikam hapoh ka phra taïew.
Kane ka la wan hadien ba ka ïingbishar ka la shimkhia ïa ka affidavit ba la file da ki nongshah mudui ka Jylla, kiba la pynpaw ba ka weighbridge kam shym la treikam shuh naduh u bnai Nailur, 2024.
“Ngi bthah ïa ka tnad Transport ban pyndep lut ïa baroh ki kam khnang ban pynlong ïa kane ka weighbridge kaba trei-kam noh hapoh ka phra taïew naduh mynta ka sngi,” ong ka Division Bench ba kynthup ïa u Chief Justice Soumen Sen bad Justice HS Thangkhiew ha ka hukum ba pynmih ha ka sngi Nyngkong.
Ka ïingbishar kala pynpaw ruh ïa ka jingsngewkhia halor ki jingduna kiba don ha ka kaiphod ba la aiti da ka Sorkar Jylla kiba ïadei bad ka jinglong jingman ki weighbridge ha kylleng ka Jylla.
U Transport Commissioner u la aiti ïa ka kaiphod ha ka 8 tarik Kyllalyngkot, 2025, ïa kaba hadien la shem ba kam long satia kaba beit.
Ka ïingbishar kala maham ïa ka Sorkar Jylla ba kan da phikir bha haba aiti ïa ka kaiphod bad ban pyntip ïa ki lad ki lynti ba la shim ban maramot ne pynïeng ïa ki weighbridge.
“Ka Sorkar ka dei ban phikir bha haba aiti ïa ki kaiphod bad ban pyntip ïa ki lad ki lynti ba la shim haba ïadei bad ka jingtrei kam jong ki weighbridge, bad kumjuh ruh ïa ka jingmaramot ne pynïeng ïa ki weighbridge ba pura, kat kaba long ka kam, ha ka kaiphod ban aiti ha lane shuwa ka sien shong bishar ban wan bad kiba hadien habud,” kala ong.
Ïa kane ka kam la rah ban bishar biang haduh ka 2 tarik Lber 2026, ha ryngkat ka jingbthah ban aiti ïa ka kaiphod halor ki kam kiba la ïaid.
