Mumbai, Nohprah:
Ki pulit jong ka Mumbai, ki la ïathuh ba ka don ka jingkiew kaba sngewkhia, ha kaba ki khynnah kiba jah rngai, ha kaba 82 ngut ki khynnah rit, ki la jah rngai tang hapoh 36 sngi, ong ki heh sorkar.
Ki jingthoh jong ki pulit ki pyni ba hapdeng u bnai Jylliew bad Naiwieng, ki don baroh 145 ngut ki khynnah kiba la jah rngai na Mumbai, ba kynthup ïa 93 ngut ki khynnah kynthei. Na ki 82 ngut kiba la pynrung kyrteng hapdeng ka 1 tarik u Naiwieng bad ka 6 tarik u Nohprah, ki samla kiba la kham rangbah ki dei kiba la shah ktah bha, ha kaba ki long palat shiteng na ki briew kiba jah. Kane ka kynthup ïa 41 ngut ki khynnah kynthei bad 13 ngut ki shynrang haduh ka rta kaba 18 snem.
Ki bor pynïaid ki la pyntip ruh ïa ki jingjia kiba ïadei bad ki khynnah kiba dang rit bha, ha kaba ki khynnah kynthei haduh san snem bad ki khynnah shynrang haduh 11 snem napdeng kiba jah ha katei ka por.
Ki pulit ki la pynrung kyrteng bun tylli ki mukotduma ha kylleng ki thanat pulit, kynthup ïa ka shnong Kurla, Vakola, Powai, Malwani bad Sakinaka. Ki jaka bapher bapher jong kine ki jingjia ka pyni ba ka jingeh ka saphriang ha ki bynta bapher bapher jong ka sor.
Ki pulit ki suba ba ka jingkhaïi briew ka dei ka daw bah kaba la pynlong ïa kine ki jingjah rngai.
Hangne ki don ki jingkheiñ basngew bashyrkhei man la u bnai, kumba la jia ha u Jylliew kaba la jia ïa ki 26 ngut ki khynnah kynthei, ha u Naitung 25 ngut ki khynnah ha kaba 15 ngut ki dei ki khynnah shynrang bad 10 ngut ki khynnah kynthei. Ha u Nailar, 19 ngut, ha kaba 5 ngut ki shynrang bad 14 ngut ki kynthei.
Ha u Nailur, ki la don 21 ngut, 6 ngut ki shynrang bad 15 ngut ki kynthei. Ha u Risaw, ki la don 19 ngut, 12 ki shynrang bad 7 ngut ki kynthei. Ha u Naiwieng, 24 ngut, 9 ngut ki shynrang bad 15 ngut ki kynthei.
Ha u Nohprah haduh ba la thoh ïa ka khubor, ki la don 11 mgut, 5 ngut ki shynrang bad 6 ngut ki kynthei.
Ka jingkiew jong ki khynnah ka la pynmih ïa ki jingdawa na ki nongïakhih bad ki kynhun kiba ïada ïa ka hok jong ki khynnah na ka bynta ka rukom pyntip ba kyrpang jong ka “Child Safety Alert” ha Mumbai.
Ki pulit ki la sdang ïa ka jingtohkit kaba bniah ha baroh ki liang kiba lah ban jia.
