Shillong, Nohprah 15
U Myntri Rangbah ka Jylla, u Conrad K. Sangma ha ka Lah Sngi U Blei u la buh ïa u mawnongrim na bynta ban tei ïa ka Meghalaya House Annexe kaba thymmai ha 9, Dr. A.P.J. Kalam Road, New Delhi.
Ïa ka jingïalang buh mawnongrim la pynlong ha ka jingdonlang u Symbud Myntri Rangbah ka Jylla, Bah Prestone Tynsong bad Myntri ka tnad GAD, Bah Sosthenes Sohtun.
Ïa kane ka Complex bathymmai yn shna ha ki ar bynta. Ka bynta kaba nyngkong kan kynthup ïa 24 tylli ki kamra ne ‘Guest Room’ ryngkat bad ka ‘Meeting Hall’ bad yn tei ïa ka ha ka jinglut kaba la antad ban long T.22 klur. Kane ka ‘Annexe’ kan ïeng ha ki sawdong-sawkun jong ka Meghalaya House Complex kaba la don lypa, kaba la tei nyngkong ha u snem 1971, ha ka jaka kaba heh kumba 1.99 akar. Haba kren ha kane ka sngi, u Myntri Rangbah ka Jylla u la ong ba ka Meghalaya House ha Delhi ka dei ban shakri shuwa nyngkong eh ïa ki paidbah ka Jylla da kaba pyntikna ïa ka jaka sah kaba bit ba biang bad kaba pdiang sngewbha ïa ki nongleit-nongwan bad ki ophisar kumjuh.
U la kdew ba ka jingkynthup shuh ïa ki kamra thymmai kan pynbiang haba phai sha ka jingnang bun jong ki briew na Meghalaya kiba wan sha Delhi na ka bynta ki jingïalang, ki ‘Interview’, eksamin, jingsumar bad kiwei-kiwei ki kam.
U la bthah ïa ki ophisar ban pyntikna ba ïa ka ïingmala bathymmai la shna ha ka rukom kaba paka tam, da kaba buh jingmut ïa ki jingdonkam katkum ka juk mynta.
“Ngi kyrmen ba ngin sa ïoh ïa ka jingtei kaba bha ha ryngkat ka jingshakri kaba biang”, u la ong.
U Myntri Rangbah ka Jylla u la ong ruh ba ka Meghalaya House ka dei ban long ka jingjied ka banyngkong eh na ka bynta ki nongshong shnong ka Jylla haba ki sah ha Delhi.
“Ynda la dep, ki 24 tylli ki kamra kin kyntiew shibun ïa ka jinglah jong ngi ban pdiang ïa ki nongleit-nongwan ba wan jngoh na Meghalaya. Nga khmih lynti ba ngin lah ban pyndep ïa ka projek ha ka por kaba biang,” u la bynrap. Haba ban jur ïa ka jingdonkam jong ka jingpynpaw pyrthei ïa ka kolshor, u Myntri Rangbah u la ong ba kane ka jingtei ka dei ban long kaba paw bad kaba pynpaw ïa ka kolshor bad ki riti-dustur jong ki nongshong shnong ka Meghalaya.
U la ban jur ba ki jaka paidbah ba la thaw ki dei ban long kiba la pynshong nongrim ha ka ban shakri ïa ki paidbah ka Jylla ha ka rukom kaba paka tam. Haba pynpaw ïa ka bynta kaba kordor jong ka jinglong briew ryngkat ki jingtei, u la kyntu ïa ki nongtrei ban pynleit jingmut ha ka jingsbun mynsiem bad ka jingpdiang sngewbha.
“Tang ki jingtei bathymmai kim pat biang. Ka jingphuh samrkhie, ka jingpdiang sngewbha ïa u briew uba wan jngoh ïa ka Delhi ha ka sien kaba nyngkong na Meghalaya ka lah ban wanrah jingkylla shi kat dei ha ka por ba ki sah ha Meghalaya House,” u la ong.
Ka jingtei ïa ka Meghalaya House Annexe la khmih lynti ba kan pynkhlaiñ shibun ïa ka jingdon bynta jong ka Jylla ha ka nongbah jong ka ri bad pynbha ïa ki jingdonkam na ka bynta ki nongleit-nongwan kiba wan jngoh na Meghalaya.
