Sydney, Nohprah:
Ki pulit ka Australia ha ka Sngi U Blei, ki la pyntip ba ki la lap ia uwei u bom ‘Improvised Explosive Device (IED)’ na kawei ka kali kaba don jingiadei bad u runar uba long u suba don kti ha katei ka jingjia thombor kaba la jia ha ka Sngi U Blei.
Haba iadei bad kane, la ong ba kawei ka seng jaitbynriew Muslim na Australia, ka la pynrem ia katei ka jingjia synreit kuli ha ka rud nong Bondi jong ka Sydney, kaba la jia ha ka Sngi U Blei.
Kumta la ong ba ka National Imams Council ka la pynpaw ka jingsngewkhia kaba jur haba iadei bad katei ka jingjia bad ka la phah ruh ia ka jingsngewlem sha kitei kiba ngat ha katei ka jingjia bad sha ki bahaiing- bahasem jong ki halor ka jingmad jongki ia kum kane ka jingjia ba sniewbok bad kaba sngewsih ha katei ka sngi.
Namarkata, katei ka seng ka la ong ba, ha kane ka kynti, baroh ki seng naduh ka Australian Muslim Community bad kiwei de ruh ki seng, ki dei ban ieng iatylli lang kawei ban ratdyngkhong ia kum kine ki kam thombor bad ban tehlakam ia ki jingma kiba wan jia ha ka imlang- sahlang na ka por- sha ka por.
