Shillong, Nohprah 15
U Lat ka Jylla, u C.H. Vijayashankar u la kyntu ïa ki skulbah bad ki kolej ba kin shim ïa ki sienjam kiba treikam ban kyntiew ïa ka jingpynsngewthuh paidbah pyrshah ïa ka jingkynrei ka jingdih drok bad ban kyrshan ïa ka jingïalap ha ka ri baroh kawei.
U Lat u la pynïaid ïa ka jingïalang kaba la long bad ki Vice-Chancellor, Principal, bad ki khlieh jong ki shlem pule jong ki jaka pule ba shalor, da kaba ban jur halor ka jingdonkam na bynta ka rukom treikam kaba ïasnohktilang – kaba kynthup ïa baroh ki nongshim bynta.
“Ki samla ki dei ka jingdon-jingem kiba khraw tam jong ka ri, bad ngi dei ban ïada ïa ki na ka jingma jong ka jingkynrei ki kam dih drok,” la ong u Vijayashankar.
“Tang lyngba ka jingïatreilang kaba ïajan hapdeng ki shlem pule jong ki jaka pule ba shalor, ki nongïalam shnong, ki kynhun seng ha ka imlang-sahlang, bad ki tnad treikam Sorkar, ngi lah ban kynjoh ïa kane ka thong,” ong u Lat.
Ka jingthmu jong ka jingïalang ka long ban pynsngewthuh ïa ki shlem pule jong ki jaka pule ba shalor bad ki nongmihkhmat ha ka imlang-sahlang ban long ki paralok kiba trei shit rhem ha ka thma pyrshah ïa u drok.
Ki nongmihkhmat na ki jaka pule ba paw, kynthup ïa ka NEHU, IIM, NIT, bad Shillong College, ki la ïashim bynta ha kane ka jingïalang.
“Ngim dei tang ki jaka pdeng jong ka pule-puthi; ngi dei ki jaka ba pynwandur ïa ki jingmut-jingpyrkhat jong ki khun samla, kiba ki jingangnud ki shim tynrai, bad ba ki nongrim ba kordor la pynheh-pynsan,” la ong u HC Chaudhary, Principal Secretary sha u Lat ka Jylla.
Na ka liang u Lat u la tyrwa ban ithuh bad burom ïa ki shnong kiba pynbna ïalade kum ki “Nasha Mukt Village” bad u la khot la wer na bynta ki lad ki lynti kiba la buh ryntih ha ka kyrdan jong ka distrik ban ïoh pdiang ïa ki jingai jingmut bad ki jingtip paidbah kiba ïadei bad ka jingkyrni ha ka jingdih drok.
