Shillong, Nohprah 15
Ka Ïingbishar Megha-laya High Court ka la pynsangeh shuwa ïa ka mukotduma kaba ïadei bad ka jingtyrwa ban pynkynriah ïa 342 tylli ki longïing jong ka Harijan Colony na Them Ïew Mawlong sha hadien ka shuti tlang, katba dang ap ïa ka rai jong ka kam kaba ïadei hakhmat ka Division Bench.
“Namar ka rai ha ka kam ba ïadei kaba dang sahteng hakhmat ka Division Bench ka dang ïai ap, buh ïa kane ka kam hadien ka shuti tlang,” ong u Justice B. Bhattacharjee ha ka hukum jong u kaba la pynmih ha ka Lah Sngi U Blei.
Ha ka 2 tarik u Nohprah, ka Meghalaya High Court ka la bthah na bynta ka jingpynbeit da ka jingïasuk halor ka jingtyrwa ban pynkynriah ïa ki 342 tylli ki longïing jong ka Harijan Colony na Them Ïew Mawlong.
Ka Division Bench kaba kynthup ïa u Chief Justice, Soumen Sen bad u Justice W. Diengdoh ka la pynsangeh shuwa ïa ka jingbishar halor kane ka mukotduma kaba kynthup ïa ka Jylla Meghalaya bad ka Harijan Panchayat Committee (HPC) ha kaba ka jingbishar kaba bud la buh ban long ha u bnai Rymphang, 2026.
“Ngi khmih lynti ïa ka jingpynbeit da ka jingsuk ïa ki jingïakynad ha kane ka por”, la ong ka Division Bench.
Ïa ka Bench la pyntip da u Advocate General ba ki jingïakren ki dang ïaid ban pynbeit ïa ki jingïakynad hapdeng ki arliang mamla, bad u nongsaid aiñ (Respondents’ Counsel) u la pyntikna ba ki jingïakren ki dang ïaid shakhmat.
“Lada jia ba ym lah ban poi sha ka jingïapynbeit, ïa ka jingkyrpad lah ban bishar halor ki ‘merit’,” la bynrap ka ‘Division Bench’.
