Shillong, Nohprah 15
Ka Joint Action Committee Muster Roll Workers Union (JACMRWU) ka la pynbna ban pynsangeh noh shuwa ïa ka jingïakhih, kaba ki la pynbna shen ha ka jingïalang ha Madan Malki, hadien ba u Myntri Rangbah u Conrad Sangma u la kular ba un sa khot ban ïakren ha ka 17 tarik mynta u bnai ne ha u bnai Kyllalyngkot 2026.
Haba kren sha ki lad pathai khubor ha Shillong Press Club, u General Secretary ka JACMRWU, u Bah Bympher Lyndem u la ïathuh ba ka kynhun dang shen ka la pynlong ïa ka jingïakhih ha Madan Malki ban dawa na ka Sorkar halor ka Floor Rate bad ka VDA.
“U Labour Commissioners u la khot ïa ka kynhun ban ïa kren ha ophis trei kam jong u, ha kaba u Commissioner u la pynshai ba na ka daw jong ka jinghiar dor ka GST ka dor jong ki mar ki mata ka la hiar bad ka tnad kam lah ban pynkiew ïa ka VDA, kaba pynlong ïa ka kynhun ban pan da ka jingthoh, hynrei haduh mynta u Commissioners u khlem ai satia,” la ong u Bah Bympher.
U Bah Bympher u la ïathuh ruh ba ka seng ka la lum ïa ka jingïalang bad buddien ïa kane ka kam bad buh ‘appointment’ ban ïakynduh ïa u Myntri Rangbah hynrei ki khlem pat ïoh satia. “Dang shen u nongaibuit jong ka kynhun, u Bah K.Pariat u la ïa kynduh ïa u Myntri Rangbah bad pynsngew halor kane. U Myntri Rangbah u la kyrpad ban pynsangeh noh ïa ka jingïakhih bad ban ïa kynduh ban ïakren bad u, ha kaba u la kular ba un ïa kynduh mynta u bnai Nohprah ha ka 17 tarik bad lada ym lah un sa khot ban ïakren ha u Kyllalyngkot 2026,” la bynrap u Bah Bympher.
Kumta u la ong “Da ka jingkular jong u Myntri Rangbah, ka kynhun ka la pynbna ba kan pynsangeh noh shuwa ïa ka jingïakhih jong ki, ka ban long ha ka 16 tarik u Nohprah 2025, ha madan Malki”.
Nalor kata, u la ong ruh ba kum ki riew rangbah ki burom mar kylliang ïa ka jingkyrpad jong u Myntri Rangbah bad ki don ka jingkyrmen ba un sa khot ban ïakynduh ïa ki ha kine ki sngi bad ki por ki ban wan.
U la ong ka kynhun ka ai khublei ïa u Myntri Rangbah bad ïa ka Kynhun Myntri kaba la pyntrei kam biang ïa ka 50% Reservation na ka bynta ki RCW katkum ka Regular Casual Workers Schemes, 1996.
U la kyntu ruh ïa u Myntri Rangbah ban peit lem bad pyllait ïa ka tulop jong ki nongtrei Muster Roll ha ka tnad Sericulture bad ka Veterinary, kiba mynta la 6 bnai ki khlem ïoh tulop. Ka kynhun ka kyntu ruh ïa u Myntri Rangbah uba bat ïa ka pla tyngka ban pyllait lem ïa ka tulop jong kine ki nongtrei ha shuwa ka Khristmas ka ban long ka jingkyrkhu na ka bynta jong ki bad ka ïing ka sem.
