Shillong, Nohprah 15
Kumba ju ong ka ktien “Ngi long nongwei ha la ka jong ka ri” lah ban ong ba ka la wanjia shisha na kaba ka seng Hynñiewtrep National Youth Front ka pynpaw ba ka la ïoh jingujor na ki trei jaka ha kaba kim nud shuh ban pyndonkam ïa ka jaka lajong namar ka jingdon kawei ka mandir ha ka shnong Beltali.
Ka shnong Beltali ka dei ka shnong ba la buhai shnong da ki jaitbynriew Hajong kaba la don mynta kumba 70 tnum ïing eiei, kane ka Shnong ka hap hapoh ka jingpeit jingkhmih ka Elaka Mawlong bad ka Elaka ka la buh ïa u Narayan Hajong ban long kum u nongpeit nongkhmih ïa kane ka shnong.
Ïa katei ka jaka ba don kawei ka mandir ba shah ban pynlong jaka mane blei, la long trai da ka Kong Khrawdor Chyne bad ïa katei ka jaka la ailad ïa ki jaitbynriew Hajong ban pynlong jaka mane da ki kmie pateng tymmen ha ki por ba kham mynshuwa. Hynrei katba nang mih ki sngi ki por katei ka jingpynlong mane blei ha katei ka jaka ka la sdang ban pur sha ki dieng ki siej haduh ba ki trai jaka haba ki mut ban leit pom dieng ha katei ka jaka lajong ki la shah pynsangeh.
Halor kane, ka Hynñiewtrep National Youth Front, South East Sohra Circle ha ka 15 tarik u Nohprah 2025 ka la hiar ban pynlong ïa ka jingjurip na ka jingïoh jingujor na ki trai jaka. Ha kaba la shem ba ka jingmane blei jong ki jaitbynriew Hajong ki la tam pud ïa ka jaka ba la shah ïa ki ban pynlong jaka mane blei.
Namar kata, u nongaiktien ka HNYF u Bah Banjop Khongwir u la kyntu ïa u Narayan Hajong ban ïakren mardor ba kin pyllait noh ïa katei ka jaka ba ki pynlong jaka mane blei, khnang ba ki trai jaka kin lah ban pyndonkam la ka jong ka jaka bad kyntu ba kin pynlong jaka mane blei tang ha ka jaka ba la shah naduh ki por ba mynshuwa.
Haba pyrshang ban wad jingtip ba kham bniah na ki trai jaka, u Bah Barnabas Nongrum uba dei u kurim ka Kong Khrawdor Chyne u la ïathuh ba u la thmu ban leit pom dieng na katei ka jaka, ki la shah pynsangeh, da kaba ki la ong ban hap ap shuwa ba ïoh jia kaei-kaei, namar ba ka la don ka jinglehniam leh rukom ïa ki dieng ki siej kiba don ha ki sawdong katei ka mandir.
