Shillong, Nohprah 15
Ka Sorkar Jylla kala pynbna paidbah ba la thaw ïa ka Urban War-fare Training Facility (UWTF) bad ka Counter Insurgency & Jungle Warfare (CIJW) School ha Jylla, ban pynkhlaiñ ïa ka tnad Pulit ha ka jingïakhun ïa ki riew-kiengatiar ha Jylla.
Katkum ka jingpynbna ba la pynmih da ka tnad Kam Pohïing (Police), ïa ka Urban Warfare Training Faci-lity (UWTF) yn pynkha ha SF-10, Mawiong.
Kane ka jaka ai jinghikai kan pynïaid ïa ki jinghikai naduh ka basic Close Qauater Battle (CQB) ne ka jingïakhun marmet, haduh ka jingpynkhuid ïa ki riewbymman na ki ïing kiba bun mala, ka jingpynlait im ïa ki nongshah rahbor, ka jingpynkhlaiñ ïa ki lad peitngor ha sor. Kane ka jaka kan pynkhlaiñ ïa ka jinglah ka Jylla, pynduna ïa ki jingma ïa ki kynhun nongkhynra bad pynjanai ïa ka jingïatreilang hapdeng ki Agency.
Ka jingpynbna ka tnad Kam Pohïing ka pyntip ruh ïa ka jingthaw ïa ka Counter Insurgency & Jungle Warfare (CIJW) School ha Baghmara, South Garo Hills, Meghalaya ban ai ïa ki jinghikai pyntbit ha ka jingïakhun ïa ki kynhun kiengatiar bad ka sap ïaleh thma ha ki jaka khlaw sha ki Pulit ka Jylla bad ki Commando nalor ban ai jinghikai ïa ki Unit ba kyrpang.
Nalor kane, ka tnad ka pynbna ruh ïa ka jingpynkha ïa ka thanad ha Byrnihat, Ri-Bhoi District ka ban tip kum ka Byrnihat Police Station.
U pud treikam jong ka thanad Byrnihat ki long ka Jorabat Outpost (Assam) sha ki bynta ba shatei, Umsning Outpost/Sonapur Police Station (Assam) sha Mihngi, Nongpoh Police Station sha ki bynta ba Shathie bad Khanapara Police Station sha ki bynta Sepngi.
