Mawkyrwat, Nohprah 15
Ki sengbhalang bapher-bapher jong ka South West Khasi Hills District (SWKHD) naduh ka KSU, SSSS, FKJGP, HANM, HITO, HNYF, HYC hadien ka jingïalang ha ka 15 tarik u Nohprah 2025 ki la leit ban ïakynduh ïa u Bah L.T Tariang, Additional Deputy Commissioner ka South West Khasi Hills District ban pyrshah jur halor ka jingthmu jong ka Sorkar ban pynkynriah kam noh ïa u Superintendent of Police (SP) ka SWKHD u Bah B. Jyrwa bad ïa kiwei ki ophisar ki bym pat kut ka por treikam jong ki.
Ha kane ka sngi, ki sengbhalang ka SWKHD ki la ïoh ruh ban ai da ka kot jingthoh bad kyrpad ruh ïa ka Sorkar ba la kumno-kumno ïa ki ophisar kiba trei bha na ka bynta u paidbah ym dei ban pynkynriah kam shiteng por khlem pat dap pura ka por treikam.
Haba ïakren bad u samla Fordwardman Nongrem, President KSU SWKHD bad u Bah Wallamkupar Syiemiong, President SSSS South West Khasi Hills District ki la ong ba hadien ka jingïasyllok bad ki nongshong shnong ka thaiñ, ki sengbhalang ki la shim ïa ka rai ban dawa na ka Sorkar ba ka dei ban pynsangeh noh ïa kane ka jingthmu pynkynriah kam ïa u SP bad ban wanrah ïa ki ophisar bar jylla ki bym dei ki Khasi namar kane kan wanrah jingeh ïa ki paidbah ka dong ka thaiñ ha ka ktien ka thylliej.
Shuh shuh ki la pynpaw ruh ba kane ka jingpynriah kam ïa ki ophisar khamtam ïa u SP uba dang trei hapoh ka shisnem kan wanrah ïa ka jingduhnong kaba khraw ïa ka distrik khamtam ba ka dei ka distrik kaba dang thymmai bad kaba dang donkam shibun ïa ki kam pynroi.
Ki la ong ruh ba tang ha kine ki khyndiat bnai ba u trei hapoh ka distrik ki paidbah ki la ïohi shisha ïa ka jingtrei shitom jong u SP na ka bynta ban rat dyngkhong ïa ki kam sniew kum u drok bad ki nongdie kyiad beaiñ ha Mawkyrwat ryngkat ka jingïatreilang bad ki paidbah, ki Seng Longkmie, ki Samla Shnong, ki Sengbhalang kumno ban wanrah ïa ka shong suk shong saiñ hapoh ka distrik baroh kawei.
Kumta ka kynhun sengbhalang ka SWKHD ka kyntu ïa ka Sorkar ba kam dei ban ïalehkai bad ki paidbah ka South West Khasi Hills District ban pynkynriah kam katba mon ïa ki ophisar khlem pat kut ka por treikam na ka bynta ka jingmyntoi jongno re jongno khlem da pyrkhat pat ïa ka jingduh nong jong ka distrik.
Ki la byrngem ruh ba lada ka Sorkar kam sngap, ki sengbhalang ryngkat ki paidbah kim banse ban mih madan ban ïakhih halor kane ka bynta.
