Shillong, Nohprah 16
U Myntri ka tnad kam jngohkai pyrthei, u Timothy D. Shira, u la pynbna ïa ka jingthmu ban buh ïa ki kor ring-dur CCTV ha ki jaka jngohkai pyrthei ba la jied (ha ka Jylla), da kaba ban jur ïa ka jingdonkam ban pynkhlaiñ ïa ki lad jingïada.
“Ngin sa buh ïa ki kor ring-dur CCTV ha ki jaka ba ngi sngew ba ka long kaba donkam,” la ong u Shira haba kdew ïa ka jingjia shah pynïap ba dang shen ha Sohra.
“Ngin sa bishar bniah ïa ka jingdonkam jong ki ‘Camera’ ha ki jaka bapher-bapher bad ngin sa buh ïa ki hadien kata,” u la ong.
U Shira u la ban jur ba ka rai ban buh ïa ki kor ring-dur CCTV kan long katkum ka jingkhmih bniah jong ki ophisar ka tnad kam jngohkai pyrthei na baroh ki distrik.
“Ngin sa khot ïa ka jingïalang ban ïakren, bad ban ïoh ïa ka jingbishar bad ka kaiphod na ki, bad ynda ki la ong ba donkam ban buh ïa ki kor ring-dur CCTV ha katto-katne ki jaka, kata ngin sa sdang,” u la bynrap.
U Myntri u la kdew ruh ïa ka jingpynleit jingmut jong ka Sorkar ban pyndep ïa ki projek kiba dang ïaid shakhmat hashuwa ban sdang ïa ki bathymmai.
“Ngi don katto-katne ki projek kiba dang sah ban pyndep, bad ngi hap ban pyndep lut ïa baroh ki projek kiba dang ïaid ne kiba dang don hapdeng ka jingpyntreikam,” la ong u Shira.
Nalor kata, u Shira u la pynsngew ïa ki jingthmu ban wanrah ïa ka ‘Block Tourism’ ha kylleng ka Jylla ban pynmih ïa ki lad kamai na ka bynta ki samla ka Jylla.
