Lucknow, Nohprah:
Ki la don kumba 13 ngut ki briew kiba la ïap bad katto katne ngut kiwei pat ki la mynsaw ha ka jingïatakhuh kali kaba jur jong ki bun tylli ki kali ha ka Yamuna Expressway ha Mathura distrik ha ka por mynstep jong ka sngi Ba-ar, ong ki pulit.
Kane ka jingjia aksiden ka la jia ha ka por 4 baje mynstep ha ka bynta jong ka surok bah Agra-Noida hapdeng ka jingduna bha ka jingshai namar ka jingkahdum jong u lyoh khyndew.
Ym duna ïa ki hynñiew tylli ki bus bad lai tylli ki kali ki la ïatyngkhuh, ha kaba kane ka la pynmih ïa ka ding. Ki bor pynlip ding bad ki nongpynlip ding ki la leit mar mar sha katei ka jaka, da kaba pynpoi 11 tylli ki kynhun pynlip ding ban tehlakam ïa ka jingpluh bad ban pyllait im ïa ki nongleit jingleit kiba sahkut hapoh ki kali ha katei ka por.
Katkum ka jingïathuh jong u District Magistrate u Chandra Prakash Singh u la ïathuh ba katei ka jingjia aksiden ka la jia hajan u maw mer ba 127 hapoh u pud u sam jong ka Baldev Police Station.
Ki heh ophisar, ba kynthup ïa u DM bad SSP, ki la khmih ïa ki kam pynlait im ba la leh da ki kynhun naduh ki pulit, ki tnat pynlip ding, ki bor pynïaid surok jong ka ri India (NHAI) bad ka State Disaster Response Force (SDRF).
La pynkylla ïa ka lynti ban leit ban wan ha ka surok bah namar ba ka surok ka dang sahkut. Hadien la phah noh ïa ki nongleit nongwan kiba sahkut sha ki jaka ba ki leit da ki kali sorkar.
Arngut napdeng kitei kiba ïap ki dei kiba la tip kyrteng kum u Akhilendra Pratap Yadav uba 44 snem ka rta uba shong basah ha Prayagraj bad u Rampal uba 75 snem ka rta uba dei na Maharajganj distrik, ong ka SHO jong ki pulit ka Baldev Police Station ka Ranjana Sachan. Baroh 13 ngut ki la ïap na ka jinging, ka la ong.
Ki nongsakhi ha kane ka jingjia ki la ïathuh ba hadien katei ka jingshah tynrah kali, la bud sa ki jingbthei kiba jur bha, bad ki nongshong shnong jong katei ka thaiñ, ki la mareh ban ïarap ha ka jingpyllait im.
Uwei u nongleit jingleit uba leit na Lucknow sha Delhi u la ong ba ka bos kaba u shong ka la sangeh kynsan hadien ba u la ïaid lyngba ïa ka Agra, hadien kata ki nongleit nongwan ki la pynbor ban plie ïa ki jingkhang kiba la khang ban ïarap ïa ki kynthei bad ki khynnah ba kin lait im.
Kane ka jingjia, ka dei kaba la jia ha ka por ba dang jur bha ka jingkahdum jong u lyoh khyndew ha kylleng ka Uttar Pradesh bad kiwei kiwei ki bynta jong ka thaiñ ba shaphang Shatei jong ka ri.
Ha ka step jong ka sngi Ba-ar, ki katto katne ki nongbah, kynthup ïa ka Agra, Prayagraj, Bareilly bad Moradabad, ki la ïoh ïa ka jingshai kaba lajan long zero degree.
U Myntri Rangbah ka Uttar Pradesh, u Yogi Adityanath, ha ka jingthoh halor ka rynsan X ha ka ktien Hindi, ula pynpaw ïa ka jingsngewlem sha kiba haïing hasem jong ki briew kiba la khlad ha ka jingjia.
“Ka jingduh noh ïa ka jingim ha ka jingjia aksiden kali ha ka surok bah Yamuna Expressway ha Mathura distrik ka long kaba sngewsih haduh katta katta bad kaba pynpangnud. Ka jingsngew-lem kaba khraw jong nga ka long bad ki longïng kiba la ïakynduh jingeh na ka jingjia,” u la ong.
“Nga la bthah ïa ki heh jong ka bor pynïaid distrik ban pyntikna ïa ka jingsumar kaba biang ïa kiba mynsaw. Nga duwai ha u Ram ba un ai jingsuk ïa ki mynsiem kiba la khlad noh bad ka jingkoit jingkhiah kaba kloi ïa kiba mynsaw,” la ong u Adityanath.
Katkum ka post na ka ophis treikam jong u, u Adityanath u la pynbna ba un ai pisa mar 2 lak sha kiba haïing hasem jong kiba ïap, bad mar T.50,000 sha kiba mynsaw.
Ka jylla ka la pynpaw ïa ki jingjia aksiden ha surok kiba ïadei bad ka jingkahdum jong u lyoh khyndew ha kine ki sngi ba la dep. Ha ka lah sngi U Blei, la ïathuh ba ki don 6 tylli ki jingjia aksiden kiba la ktah ïa 31 tylli ki kali.
Ha ka sngi U Blei, ki don 29 tylli ki kali kiba la shah tynrah ha ki 6 tylli ki jingjia aksiden, ha kaba hynñiew ngut ki briew ki la ïap, katba 8 tylli ki jingjia ha ka sngi Saitjain kiba la don jingïadei bad ki 40 tylli ki kali, kiba la shim ïa ka jingim jong saw ngut ki briew.
