Shillong, Nohprah 16
Ki pulit ka Anti Narcotics Task Force (ANTF) ki la ïoh ban kurup noh ïa u drok uba khia kumba 16.86 gram bad ka pisa na kawei ka ïing ha ka thaiñ Pdengshnong, Lower Mawprem, Shillong.
Katkum ka khubor kaba la ïoh na ka website jong ki pulit la ong ba ha ka 13 tarik mynta u bnai ha ka por kumba 8 baje mynmiet, hadien ka jingïoh jingtip, ki pulit ANTF ki la bat noh ïa u briew ba kyrteng u Lambert Kyndait na ka ïingsah jong u ha Pdengshnong, bad ha kaba la ïoh ruh ban kurup ïa u drok ba khia kumba 16.86 gram ba la suba ba u dei u heroin, 120 tylli ki ‘vials’ bad ka pisa kaba long T.14,100/-.
Ha kawei pat ka khubor, u Aidous Mawlong u la ai ka jingujor sha ki pulit ba ha ka 12 tarik mynta u bnai, ha ka por kumba 5.30 janmiet, ki runar bym lah ban ithuh ki la tuh ïa ka mobile phone jong u na Shillong Club.
Na ka liang jong ka Kong L Mami Rynjah ruh ka la ai ka jingujor ba ha ka 13 tarik mynta u bnai, ha ka por kumba 3.30 janmiet, ki runar bym lah ban ithuh ki la prong tuh hapoh ka ïing jong ka, kaba don ha Madanrting Block-F, Shillong bad ban rah tuh ïa kawei ka tyndong lyer shet jingshet (LPG cylinder).
Ka Bedilla Sangma ruh ka la ai ka jingujor ba ha ka miet jong ka 30 tarik u bnai ba la lah, ki runar bym lah ban ithuh ki la tuh ïa ka mobile phone jong ka, na ka ïingsah jong ka, kaba don ha ka shnong Gabil Bisa ha East Garo Hills.
