New Delhi, Nohprah:
Ka ïingbishar jong ka nongbah Delhi, ha ka sngi Ba-ar, ka la kyntait ban shim khia halor ka jingkynnoh jong ka kynhun Enforcement Directorate (ED) pyrshah ïa ki nongïalam ka Congress, u Rahul Gandhi bad ka Sonia Gandhi ba ki la donkti ha ka jingkamai pisa bymhok, lem bad phra ngut kiwei pat, ha ka mukotduma jong ka National Herald. Ka kynhun ka la ong ba kan tuklar ïa katei ka hukum ha ka ïingbishar kaba kham heh.
U nongbishar ba kyrpang u Vishal Gogne u la ïohi ba ka jingpynngat jong ka kynhun ED ka mih na ka jingujor ba la ujor da u riew shimet ym na ka jingujor ejahar ba la pynrung kyrteng kaba ïadei bad ka kam runar ba la buh por.
Kumta, ka jingshim khia ïa ka kot pynngat kam long kaba lah katkum ka aiñ, la ong ka ïingbishar.
U nongbishar u la kdew ba ka tnad jong ki pulit jong ka Delhi kaba dei peit ïa ki kam runar ha ka liang ka ïoh ka kot ka la dep ban ujor ejahar, bad kan long kaba dang kloi ban bishar bniah ïa ka jingbha jong ki jingkynthoh jong ka kynhun ED.
Ka kynhun ED ka la kynnoh ïa ki nongïalam ka Congress ka Sonia Gandhi bad u Rahul Gandhi, kumjuh ruh ïa ki nongïalam jong ka seng ba la khlad noh, u Motilal Vora bad u Oscar Fernandes, ha ryngkat u Suman Dubey, u Sam Pitroda, bad kawei ka kompeni shimet, ka Young Indian, ba ki don ka jingïasuhbuit halor kane ka jingkamai tyngka bymhok.
La kynnoh ba ki la ïoh ïa ki jingdon jingem kiba la kot sha ka T.2000 klur kiba dei jong ka Associated Journals Limited (AJL), kaba pynmih ïa ka kotkhubor National Herald.
Ka kynhun tohkit ka la kynnoh shuh shuh ba ki Gandhi ki bat ïa ka bynta kaba heh tam kaba 76 percent ha ka Young Indian, kaba “da kaba thok” ka la knieh ïa ki mar ki mata jong ka AJL ha ka jingsiew kylliang ïa ka ram kaba T.90 klur.
