Shillong, Nohprah 16
Ka Sorkar Jylla ka la kyntait ïa ka jingdawa ban khang ïa ki ‘Tourist’ taksi kiba wan nabar, da kaba kdew ba ka long kaba ym lah ban leh katkum ka aiñ.
Ha ka jaka jong kata, na ka liang ka Sorkar kan khot ïa ka jingïalang bad ki nongpynïaid ‘Hotel’, ki trai ‘Resort’, bad ki ‘Tour Operator’ ban kyntiew haba phai sha ka jingpyndonkam ïa ki ‘Tourist’ taksi na ka Jylla.
Ïa kane ka rai la shim ha ka jingïalang ba la pynïaid da u Symbud Myntri Rangbah ka Jylla bad Myntri ka tnad Transport, Bah Sniawbhalang Dhar bad ka kynhun ka All Khasi Meghalaya Tourist Taxi Association (AKMTTA) ha ka Sngi Ba-ar.
“Ngi la ïoh ïa ka jingïalang kaba seisoh, kaba bha shibun,” la ong u Bah Dhar sha ki nongthoh khubor.
Ka seng ka la kyrpad ban khanglad ïa ki ‘Tourist’ taksi kiba nabar, hynrei u Bah Dhar u la ong ba ïa kane kam long kaba lah ban leh katkum ka aiñ.
“Katkum ka aiñ, ym lah ban khang ïa ki kali ba nabar ban wan sha kane ka Jylla, kumta ki sngewthuh bha ïa kata. U Advocate General (AG) u la pynpaw ba katkum ka aiñ ym shah ban khang ïa ki kali ba nabar ban wan sha kane ka Jylla,” u la bynrap.
Hynrei ka Sorkar ka la mynjur ban kyrpad ïa ki nongpynïaid ‘Hotel’ bad ki ‘Tour Operator’ ban ïasnohktilang bad ki ‘Tourist’ taksi jong ka Jylla.
“Ngin sa khot ïa ki trai jong ki ‘Hotel’, ‘Resort’, bad ki ‘Tour Operator’ bad kyrpad ïa ki ban pyndonkam ïa ka jingshakri jong ki ‘Tourist’ taksi ka Jylla,” la ong u Bah Dhar haba pyntip ba yn sa pynlong biang ïa ka jingïalang bad ka seng ki ‘Tourist’ taksi ha ka kyrdan jong ki ophisar ka tnad Transport bad kam jngohkai pyrthei.
Na ka liang u Symbud Myntri Rangbah u la ban jur ruh halor ka jingdonkam jong ki nongñiah taksi trai-ri ban pynneh ïa ka kyrdan kaba ha khliehduh.
“Ngi kyrpad ïa ki ‘Tourist’ taksi napoh ka Jylla ba ki kali jong ki – ki dei ban long kiba bit ba biang, kiba khuid, bad ki nongñiah ki dei ban long kiba don akor, khnang ba ki nongwan jngohkai pyrthei kiba wan sha Meghalaya kin sngewkmen ïa ka jingshakri jong ki,” u la ong.
Nalor kane, la thmu ban ïamir jingmut shuh-shuh ban wad ïa ki lad ki lynti ban kyntiew ïa ka kam jngohkai pyrthei jong ka Jylla, kynthup ban pynmih ïa ka ‘App’ kaba thymmai ha ka ban pyninam ïa ki jaka jngohkai bad ki jingshakri jong ka Jylla.
