Shillong, Nohprah 16
Ki bor district ka East Khasi Hills kila pynmih ïa ka hukum ban khang ban ïaid ki kali heh ba kit mar ba khia palat ka 9 MT na ka surok Thangsning-Thynroit-Mawpyrshong bad ka Mawkynrew-MynsangJatah.
Kane ka hukum ba la pynjari hapoh ka kyndon 163 BNSS, ka thmu ban tehlakam ïa ka jingnang sniew ka surok, kaba la jot na ka jingïaid ki kali kit mar ba palat pud.
Katkum ka khubor, ka jingïai bteng ban ïaid ki kali kit mar ba palat pud, ka la buh ha ka jingma ïa ka jingshngaiñ ki nongleit nongwan ka thaiñ bad buh jingma ruh ïa ki nongkynti ki briew ka thaiñ.
Kiba pynkheiñ ïa ka hukum kin ngat ha ka jingshah bishar aiñ hapoh ka kyndon 223 jong ka BNS bad kiwei ki kyndon jong ka aiñ. Kane ka hukum kan treikam mardor bad kan ïai bteng ban treikam haduh da pynmih da kawei pat ka hukum.
