Shillong, Nohprah 16
Ka jingdheng kali ha ka thaiñ Upper Shillong ka la sdang ban jur biang naduh ba la sdang ban pynmadan ïa ka surok Four-Lane na lad Lummawbah namar ka dang dei ka surok khyndew haba ki kali ki hap ïaid suki haduh ban da poi ha jingkieng Umshyrpi haduh Rilbong.
Ka jingsdang ban pynmadan ïa ka surok na lad ka shnong Lummawbah ka dei naduh 14 tarik mynta u bnai ha kaba ka surok kaba rim ka la don shajrong katba ka surok thymmai ka la don shapoh namar ka kompeni ka la pynryntih ïa ka surok ba wan na 101 Area ban poi sha jingkieng thymmai kaba dang shna mynta ha Umshyrpi.
Ka jingjur ka jingsahkut kali ka dei namar ki kali ki hap ïaid suki haba ki poi sha jingkieng Umshyrpi namar ka la khapngiah naduh ba la pynpra khyndiat naduh ba la sdang ban tei ïa ka jingkieng ba thymmai.
La ïohi ba ki pulit ki hap ban wan pynïaid kali naduh lad Lummawbah khnang ban nym don ka jingsahkut kiba rung kiba mih na Lummawbah sha surokbah.
Ka jingshna ïa ka surok Four-lane na Baniun ter-ter shaduh jingkieng Umshyrpi ka dang ïaid shaid-shaid namar ha ki thaiñ ba sah ki shipai suiñ la don ba la siang rong, katba na madan Sawmer shaduh jaka die soh ha Laimer, ka jingtrei ka dang ïaid shaid-shaid.
Nangta ka jingtrei ka dang ïaid shaid-shaid ha 101 Area ban kynroh ïa ki jaka sah ki shipai bad ka jingtrei kaba dang kham shimpor ka dei ha jingkieng Umshyrpi namar ki don ki kynroh kiba dang trei.
La ïohi ba na jingkieng Umshyrpi shaduh sha Rilbong la pynmadan ïa ka surok ban pynpoi sha ki thaiñ Jhalupara ban pynheh ïa ka surok khnang ban nym sahkut ki kali lada kiba leit sha Iewduh.
Kumban shu pynkynmaw u Symbud Myntri Rangbah ka Jylla, Bah Prestone Tynsong u la pynbna ba ka Sorkar ka buh thong ban pyndep ïa ka surok Four-Lane kaba dei ka surok kaba ïaid saw tylli ki kali ha ka juh ka por yn pyndep noh hapoh u bnai Nohprah mynta u snem 2025 hynrei haduh mynta ka jingshna ïa kane ka surok ka dang ïaid shaid-shaid.
Kane ka jingangnud u Bah Prestone Tynsong lada peit da ki khmat jong ki riew paidbah kan nym lah ban pynurlong ban pyndep mynta u bnai Nohprah namar ka jingshna ïa ka kynroh ha Umshyrpi ka dang ïaid shakhmat kumjuh ruh ka surok ha syndah ka skul Gorkha ruh ym pat lah ban pynpei shaduh 101 area namar ki kali ki dang ïaid ïa ka surok rim.
