Shillong, Nohprah 16
Ka Hynñiewtrep Youth Council (HYC) Mawkyrwat Circle ha ka 16 tarik u Nohprah 2025, ka la leit ban ïa kynduh ïa ka Director General Of Police (DGP) ka Kong Idashisha Nongrang ha ryngkat ka dorkhas, ban kyrpad pynneh shuwa ïa u Bah Banraplang Jyrwa, uba dei u Superintendent of Police ka South West Khasi Hills District.
Haba kren sha ki lad pathai khubor, u samla Wallambor Nongsiej, President HYC Mawkyrwat Circle u la ong ba ka seng ka kyrpat na ka DGP ban pynneh shwa ban nym pat pynkynriah ïa u SP na SWKHD, namar kane ka dei ka jingkwah ki paidbah jong ka District hi baroh ka wei.
“Ka jingkwah ki paidbah ban nang pynneh ïa u SP, ka dei namar ba u la lah ban rat dyngkhong ïa ki kam sniew bad ka jinglah jong u ban trei ryngkat bad ki paidbah jong ka District,” u la ong.
U samla Wallambor u la ïathuh ruh ba u SP u dang trei tang 11 bnai bad ki dang bun ki kam kiba dang sah ba u hap ban trei na ka bynta ka jingbha jong ka District.
U la ong ba na ka liang ka DGP kam shym la lah ban ai ïa ka jubab kaba tikna sha ka seng, hynrei kan ïaleh katba lah ban leh halor kane ka jingkyrpad jong ka seng.
Ka seng ka la pynsngew ruh sha ka DGP ha kaba ïadei bad ka jingdon ki pulit ANTF ka long kaba seisoh bha ka rukom treikam hapoh District ha kaba ïadei bad u drok, hynrei ki kwah ba kin nang pynkhlaiñ shuh shuh, khnang ban pynduh pyndam syndon ïa u drok hapoh ka District, la bynrap shuh shuh u Samla Wallambok.
“Ki paidbah baroh ki sngewbynnud lada shah pynkynriah kam noh ïa u Bah Banraplang Jyrwa, namar ba u la lah shisha ban rat dyngkhong ïa ki jingsniew bad ngi don ka jingkyrmen ba lada ngin ïatreilang, yn sa lah ban pynduh pyndam ïa kine ki kam sniew bad ban wanrah ïa ka shongsuk shongshngaiñ ha ka District,” u la ong.
Nalor kata, u samla Wallambor u la ïathuh ba u Bah Banraplang Jyrwa u dang bat tang khyndiat por ïa ka kam SP ha ka SWKD bad ka por ruh ka dang lyngkot palat, kumta u la ong ba dei ban ai lad ba un trei shuwa ha ka District.
