Shillong, Nohprah 16
U MP ka Shillong, Dr. Ricky AJ Syngkon u la kyrpad ïa u Myntri ka tnat Kam Pohïing ka Ri u Amit Shah ba un pyntreikam lang noh ïa ka Inner Line Permit (ILP) ha Meghalaya, haba pynpaw ïa ka jingsngewkhia ïa ka rukom long ka jaka kaba buh ha ka jingma, ka jingshah klun jaka bad ka jingïoh rung kyrthep ki mynder.
Ha ka shithi ba la phah ha ka sngi Ba-ar, u Dr. Ricky AJ Syngkon u la ban jur ba ka jingpyntreikam ïa ka ILP kan pynhap lang ïa ka Meghalaya bad kiwei ki Jylla jong ka thaiñ Shatei Lam-Mihngi bad ban ïada ïa ka jingmyntoi ki jaidbynriew trai ri trai muluk. “Ka ILP kam beh ïa kino-kino ki nongshong shnong ka ri India ba kohnguh ïa ka aiñ, hynrei, ka pynlong kongsan ïa kito kiba wan rung shapoh Jylla na shabar ba kin pynrung kyrteng ïalade, ban pyntip ïa ka jingthmu, bad ka por ba kin sah,” u la ong.
“Namar kata, da kaba burom nga kyrpad ba ka Ministry of Home Affairs kan ai jingmynjur ha ka ban pyntreikam lang noh ïa ka Inner Line Permit ha Meghalaya hapoh ka Bengal Eastern Frontier Regulation, 1873, ka ban long ruh katkum ka rai ba la mynjur lang da ka ïingdorbar thawaiñ ka Jylla ha ka 19 tarik Nohprah 2019,” thoh u MP.
U Dr. Syngkon u la kyrpad ïa ka Ministry ba kan thaw ïa ka Joint Technical Committee ba kan pynkhreh ïa ki kyndon pyntreikam ïa ka ILP nalor ban pyntip ruh ïa ka Parliament bad ka State Assembly halor ka jinglong jingman bad ka jingtyrwa pyntreikam ïa ka ILP khnang ba ki nongshong shnong kin tip ba ïa ka jingsngewkhia jong ki la shimkhia ban leh eiei katkum ki lynti ba dei ïaid.
U MP u la kdew ïa ka jingdonkam jong ka ILP na ka bynta ban ïada ïa ka jingkylla dur jong ka jaka bad ruh ban pynkhlaiñ ïa ka rukom pynïaid ha khappud.
U MP u la ban ruh ba ka ILP kan kyrshan ïa ka roi ka par bad ki kam jngohkai, haba ai nuksa na kiwei ki Jylla ba pyntreikam ïa ka ILP ha ka thaiñ Shatei Lam-Mihngi.
