Shillong, Nohprah 16
U nongïalam ka National People’s Party (NPP) bad Symbud Myntri Rangbah ka Jylla, Bah Sniawbhalang Dhar u la pynpaw ïa ka jinglong kloi jong u ban pdiang sngewbha ïa u Dr. Mukul Sangma lada u wan pynïasoh sha ka NPP da kaba ong “Ngan dei u briew uba kmen tam lada u wan sha ngi.”
U Bah Dhar u la kren ïa kane haba kylli shaphang ka jinglah ban pynïasoh jong u Dr. Sangma, da kaba ban jur ba ka dang “kloi eh ban kren eiei” naba ka dang don sa ar snem shiteng ban ïoh ïa ka ilekshon.
Haba ïadei bad ki jingkren ba dang shen jong u Dr. Sangma, u Bah Dhar u la jied ban burom ïa une u nongïalam ba rangbah.
“Nga burom ïa u Dr. Mukul Sangma, u dei u nongïalam uba tbit bad uba la rim bha…ngam kwah ban kren ïa kiei-kiei kiba la dep,” u la ong, da kaba pynpaw ïa ka jingïalong paralok jong ki.
“Nga ïa long paralok bad u, bad u ruh u ïa long paralok bad nga,” u la ong.
