Shillong, Nohprah 16
Ka All Khasi Meghalaya Tourist Taxi Association (AKMTTA) ka la pynkhreh ban pynlong shuh ïa ki jingïakren bad ka Sorkar Jylla ban thaw ïa ka mat treikam ka ban pynbeit ryntih ïa ki kali ‘Tourist’ kiba wan na shabar jong ka Jylla.
Kane ka long hadien ka jingïakynduh hapdeng ki nongmihkhmat ka AKMTTA bad u Symbud Myntri Rangbah ka Jylla, Bah Sniawbhalang Dhar, ha kaba ki la ïathir sani bha halor ki bynta ba ïadei bad ka aiñ ban pyntreikam ïa kum kane ka polisi ne mat treikam.
U nongaiktien ka AKMTTA, Bah Balajied Jyrwa, u la ong, “Ha ka jingïalang mynta ka sngi, u Advocate General u la don lang, bad ngi la ïakren halor ki mat ba ïadei bad ka aiñ na ka liang jong ka Sorkar Jylla bad ka seng, ba kynthup kumno ban ïakhun ïa kine ki mat treikam ha ka ïingbishar.”
Kane ka seng ka thmu ban khang ïa ki kali bym dei nombor Meghalaya ban kit ïa ki nongleit-nongwan sha ki jaka jngohkai pyrthei hapoh ka Jylla.
U Bah Jyrwa u la ban jur, “Ngin sa ïakynduh biang ïa u AG ban thaw ïa ka rukom treikam, da kaba pyrkhat ïa ki aiñ kum ka ‘Non-tribal Act’, ‘Motor Vehicle Act’, bad RTA.”
Ka jingïalang ka la pynpaw ïa ki jingsngewkhia halor ka jingtreikam jong ki aiñ kiba la don lypa, kynthup ïa ka RTA, kaba buh jingeh ban pyntreikam ïa ki jingpyrkhing ïa ki kali kiba nabar ka Jylla.
U Bah Jyrwa u la kdew, “Ki don ki jingeh ha ka ban pyntreikam ïa ka RTA, naba ka treikam tang bad kawei ka ‘State Permit’, hynrei ki don ruh ki ‘All-India Permit’ bad kito ki ‘Permit’ kiba treikam ha lai tylli ki Jylla na ka bynta ki kali ‘Tourist’.”
Ki jingïakren ki dang ïaid shakhmat, ha kaba ka AKMTTA ka dang wad ban pynbeit ïa ki kyndon ban pyrkhing ïa ki kali kiba na shabar.
Shuh shuh u Bah Jyrwa u la pyntikna, “Kane ka jingïalang kam dei kaba kut; ka dei ka jingïakren, bad ngin dang ïai bteng ban ïakynduh ban pynbeit ïa ki kyndon ban pyntreikam ïa ki jingpyrkhing ïa ki kali kiba wan na shabar ka Jylla.”
