Washington, Nohprah:
U President ka United States, u Donald Trump, ha ka Sngi Nyngkong u la ong ba u kwah ia u nongialam ka China- u Xi Jinping, ba un pyllait noh ia u Jimmy Lai bad ia kane u la pynpaw hapdeng ka jingpynpaw jong u ia ka jingsngewkhia haba iadei bad ki jingjia ha Hong Kong.
“Nga sngewsih haduh katta katta. Nga la ïakren bad u President Xi halor kane, bad nga la pan ban pyrkhat ban pyllait noh ïa u,” ong u Trump haba ïakren bad ki nongthoh khubor, khlem da batai bniah ïa ka por ba u kylli ïa u Xi.
“U dei u briew uba la kham rangbah, bad u don ha ka met ka bym koit. Kumta nga la buh ia kata ka jingkyrpad. Ngin sa peit aiu kan jia.”
U Trump, u la ong shuwa ba un leit phai biang sha White House ba u kwah ban pyllait ia u Lai, u nongkhaii ba jop uba la pynmih ia ka kot khubor kaba kyrshan ia ka synshar paidbah, ka Apple Daily.
U Trump, ula iakynduh ia u Xi, ha u bnai Risaw ha South Korea, ha kaba la ngeit, ba u dei uba la rah ia ka kam jong U Lai.
U Secretary ka sorkar jylla, u Marco Rubio, ha ka jingthoh ha ka platform ‘X’ tang hadien ba u Trump u la kren, u la ong ba katei ka rai ka pyni ia ka jingkut jingmut jong ka China ban “pynsngap jar ia kito kiba wad ban iada ia ka jinglaitluid ban kren bad kiwei kiwei ki hok ba kongsan.”
U la kdew ba ka China ka la kular ban pynneh ia ka rukom treikam kaba kyrpang shwa ba ka Bilat kan aiti ia ka jaka pyniaid pisa ha u snem 1997.
“Ki khubor ki pyni ba ka jingkoit jingkhiah jong u Mr. Lai ka la nang sniew bha ha ki por ba u don palat 1,800 sngi ha phatok,” la ong u Rubio ha ka kyrwoh.
“Ngi kyntu ia ki bor synshar ban pynkut noh kloi katba lah ia kane ka jingeh bad ban pyllait noh ia u Mr. Lai halor ki nongrim ba iadei bad ka jinglong briew.”
U Lai, u dei u Katholik uba riewblei, ha kaba ka mukotduma jongu, ka la shah rah ha America, da ka jingiatreilang ad hoc jong ki nongiasaid aiñ jong ka synshar paidbah bad ka jinglaitluid jong ki nongthoh khubor bad ki nongialeh pyrshah Khristan, kiba long ka nongrim ba kongsan jong u Trump.
U Lai, uba don 78 snem ka rta bad uba pang shini, la lap ba u donkti ha ka sngi Nyngkong ha baroh lai tylli ki jingkynnoh ha ka jingbishar jong ka jingïada ri bad u lah ban pynlut ïa ka jingim jong u ha phatok, hadien ba u la dep ban shah set phatok naduh ba la kem ïa u ha kaba kut jong u snem 2020.
Ka jingshah rai pynrem jong u ka long shi bynta jong ka jingpynshitom beiñ jong ka China ïa ka Hong Kong hadien ki jingïakhih paidbah ha u snem 2019.
