Shillong, Nohprah 16
Ka Hynñiewtrep Achick Nationnal Movement (HANM) East Khasi Hills District ha ka 16 tarik u Nohprah 2025, ki la leit sha ïewduh ban pynlong ïa ka jingpeit bniah ïa ka jingthew jingwoh jong ki dukan bar jylla hapoh ïewduh.
Kane ka jingleit ka HANM ka dei hadien ba ki la ïoh ka jingujor na ki nongthied nongpet, ba bunsien ki la shah thok, ha ka thew ka woh, ha ka por ba ki leit siew leit tda na ïewduh, khamtam eh haba ïadei bad ki mar thew kilo ba bunsien ki mar ki duna thew, khamtam haba ki thied na ki dukan bar jylla,
Ha ka por ba ka HANM ka la hiar ban pynlong ka jingpeit bniah, ki bor pulit ki la wan ban pynsangeh mardor, da kaba ong ba kim don hok ban shu wan kumne khlem da ïoh jingbit.
Ki bor pulit ki la ong “Haba wan ban peitbniah, donkam ban wan lang bad ki bor ba dei khmih, khnang ban lait na kano-kano ka jinghuri hura”.
Ka la mih ruh ka thma ktien hapdeng ki bor pulit bad ki dkhot ka HANM mamar ba ki pulit kim shym la shah ba kin shu wan ban peitbniah khlem da ïoh jingbit shuwa. Ki pulit ki la phah sangeh mardor da kaba bthah ba kin sa wan hadien ryngkat bad ka KHADC khang ba kan lait na kano-kano ka jinghuri hura.
Haba kren sha ki lad pathai khubor u Bah Barthol Sohlang, Secretary ula ïathuh ba ha ka jingpeit bniah ka seng, la lap ba ka la don shisha ka jingleh thok leh shukor jong ki dukan bad khamtam ki bar jylla.
U la ong ruh ba mar shu poi u bnai tlang ki mar ki mata ki kiew dor kynsan bad kane ka pyni ïa ka jingshah khñiot bad kaba long be-aiñ shisha.
“Ka seng ka la maham jur sha kine ki nongdie ba kane ka dei tang ka jingsdang bad nangne shakhmat ka seng kan sa wan beit na ka por sha ka por ban talasi hapoh ïewduh,” la bynrap u Bah Barthol Sohlang.
