Shillong, Nohprah 16
U Timothy D Shira uba dei u Nongïalam ka NPP bad ruh u Myntri ka Sorkar Jylla u la pynpaw ïa ka jingsngew skhem ba ka seng jong u, kan khur ïa ka jingjop ha ka ilekshon MDC sha Garo Hills Autonomous District Council (GHADC), da kaba kdew ïa ki jingtreikam jong ka NPP hapoh ka District Council.
“Ngi la synshar ym tang hapoh ka Jylla hynrei wat ha ki District Council bad ngi la ai ka jingshakri ba radbah ïa ka District Council,” ong u Timothy haba kren sha ki nongthoh khubor ha ka sngi Ba-ar.
U pynpaw ha kaba ïadei bad ka jingsiew ïa ka tulop ba 12 bnai sha ki nongtrei ka GHADC, kaba la lah ban pynurlong da ka jingpyrshang jong u Myntri Rangbah ka Jylla Conrad K Sangma, kaba dei kawei na ki thong kaba khraw bha.
Halor ka jingkynnoh jong ka jingpyndonkam bakla ïa ka pisa, u Timothy u la ong “Ki jingkynnoh kin don beit ha ka kam saiñ pyrthei. Wat lada ngi leh ïa ka kam kaba bha, kan don beit ka jingkynnoh, kan don beit ka jingpynrem. Kane ka dei ka kam jong ka Liang Pyrshah”.
U la pynhap ïa kine ki jingkynnoh sha ka jingthmu jong ki Liang Pyrshah kiba pyrshang ban ïoh jingmyntoi ha ka kam saiñ pyrthei.
