Shillong, Nohprah 16
U Myntri ka Sorkar Jylla u Bah Sanbor Shullai ha ka sngi Ba-ar u la leit ban ai jingïarap da ka song pisa ïa ka Ferrando Transit Home cum Children Orphanage Home kaba don ha Mawdatbaki Mawlai, Shillong, ha ka jingrakhe lypa ïa ka Khristmas bad Snem Thymmai ha katei ka jaka kaba don 87 ngut ki khynnah.
Haba kren u Bah Sanbor u la ïaroh ïa ki dkhot bad ki nongtrei jong kane ka jaka, kiba la pynlong ïa ka jingrakhe bad u la ban jur ïa ka jingkongsan ban shakri ïa ki parabriew, da kaba sot na ka ktien bakhuid, “Ka jingshakri ïa ki briew ka dei ka jingshakri ïa U Blei”.
Haba aiti ïa ka song jingïarap kaba long T.1 lak, u Myntri u la ong, “Nga dap da ka jingkmen ban ïadonbynta bad kane ka khyllipmat jong ka jingkmen bad jingsngewbha”.
Ha kane ka sngi la ïoh ruh ïa ka jingpyninam na ki khynnah, kynthup ka jingrwai ïa ki jingrwai Khristmas, ka jingak ïa ka drama lyngkot ha kaba ïadei bad ka jingkha ïa u trai Jisu Khrist bad kiwei-kiwei ki jingïakob.
Hashwa kane, ka Sister Dalina Francis G kala pdiang sngewbha ïa baroh kiba la wan sha kane ka jingrakhe katba ka Naphi Laso, Deputy Chief Legal Aids Reform Council ka la ai jingkren.
