D H Kharkongor
Ka jingkmen bad ka jinghun mynsiem ïa baroh kiba la kiew Klas. Kaba katno tam ïa ki kmie ki kpa, kiba la kyrshan shitom, baroh shisnem, ïa ka pule ka puthi. Ka jinglut jingsep kaba katto katno ruh ka don jingmut, wei ba kam shym la long sepei. Ka jingkiewklas ka dei kawei ka daw ba kin ïa khmihlynti, baroh shi ïing, sa ïa ka Christmas kaba da kit jingmut shisha shisha.Kaba sah ka dei sa ka riam ka beit ka bathymmai ïa ki khun ki kti, wei ba ki dang dei ka kyrta, wei ba ki la kiewklas bad khamtam eh wei ba kane ka dei ka ïa jong ka Christmas. Hynrei ym lah khlem da sngewlem ïa kiba ym lah shuh ban bteng ïa la ka pule puthi, kata, kiba hap ban sangeh noh. ñiuma, ïa kiba dang don lad ban kynriah noh sha ka skul kaba kham duna ka baiskul.
Te to ngi ruh ngin ïa long lem kum ki khynnah, kata, ba ngin nym ïa tai lada ka 25 tarik u Nohprah ka da dei shisha ne em kata ka sngi jong ka jingwan long briew ka jong U Jisu Khrist, uba U Blei, shane sha pyrthei.Ngin nym ïa tai lada ka dei shisha ne em ka jingrakhe kaba kyrpang ïa u Jisu Khrist ne ba ka dei pynban ka jing-rakhe kyrpang ïa U Nimrod lane ïa u Baallane ïa katei ka Sngi kaba hangtei ha sahitbneng. Ka Sngi kaba ha sahit bneng ïa kaba la ngeit ba ka dei ka bor bad ka thymmei ka jong kiei kiei baroh kiba don jingim. Ngin nym ïa tai ruh de da kano ka rukom dei ban rakhe ïa ka jingwan long briew ka jong U Jisu Khrist. Namar kata ngin ïeh ïa kine kiei kiei baroh ha ka jingsngewthuh lane ha ka jingngeit kaba shimet shimet.Ngan pynkynmaw biang ba wat U Blei hi ruh u ai ïa nga bad ïa phi ïa ka mon kaba laitluid. Te kumta to leh ïa kaba phi ngeit bad kaba phi pdiang ba ka dei, khlem da pynbor pat de ïa kita kiwei.Ynnai leh ïa kaba phi ngeit skhem ba kam dei bad ynnai beiñ ynnai kynthoh pat de ïa kita kiwei.
Kane ka dei ka por kaba kiba ioh lad ki la nang ïa leitphai noh shwa sha la ki iïng lane sha la ki jong ki shnong ki thaw. Ka por jong ka jingangnud ban ïa poi lang noh bad ban ïa don lang noh shiïing shisem na ka bynta ka jingrakhe kyrpang ïa ka Christmas lem bad u Snem Thymmai, ïa uba baroh ngi ïa angnud. Ka dei ruh ka por jong ki jingkyntiew Kurim. Kiba ym pat ïoh lad ban leit ïing te kin dang hap ban ap shwa sa shipor. Ka dei kaei kaei kaba katkum kato ka jingrwai “I’ll be home for Christmas’ bad ruh kat kum kane ka ‘Bosti ja bole, time ahi shae’ kaba mynta shen. Ka jingrwai ‘Bosti ja bole, time ahi shae’ ka dei ka jingrwai kaba da kit jingmut bad ka sur ruh kaba da sngewtynnad shisha shisha. Kaba katno tam ïa kiba lah ban sngewthuh ïa ka ktien Nagamese kaba dei ka ktien pdeng jong ki riewlum Naga bad kaba ïa jan bha bad ka ktien ‘Assamese’. Nga ngeit ba tang kato ka bynta kaba da ka ktien ‘Nagamese’ ka lah biang eh, kata, wat lada ym lah ban sngewthuh ïa kito ki bynta, ki jong ka jingrwai, kiba da ka ktien ‘Yimkhiung’.
Kumta mano bym kwah lane bym angnud, ha kum kine ki por, ban ioh ban leitphai sha la shnong ha ryngkat ka ‘tyngka’ kaba la kynshew shitom lem bad ki ‘jing-aisngewbha’ kiba kyrpang,na ka bynta kiba ieit thoiñ thon, kiba ap khmih lynti ïa ka jingïadonlang,kaba kyrpang shisien shisnem, na ka bynta ban ïa rakhelang, kum shiïing shisem, ïa ka ‘Christmas’ kaba lem bad ka ‘New Year’ ? Kum ban shu ong noh wat kiba shah tehmraw ruh ki ïa angnud bad thrang hir hir ba ki kynrad kin pyllait kyrpang ïa kiba kin ioh leit rakhe Christmas lem bad ka New Year bad la ka ïing, ka sem kaba sha la shnong. Te kumta wat lada ym lahbor ban kynshew kyndiat kat banleit rah kaei kaei ruh pynban kampher tang ba la don shwa ïa ka bai kali na ka bynta ban leitphai sha la shnong, kumba kiba ha la ïing, kiba ha la shnong, ki ïa apkhmihlynti dik dik. Lada wan thylli ruh kampher. Ym pher lada wan thylli naba ka bam ha la ïing, khamtam ka doh ka keh, kam duna. Ka pahuh pahai pynban kat ban dap ïa baroh lang. Ki kyntien ‘Pocket khaliaseehoilebi’, ha ka jingsngewthuh ka jong nga, ka thew ïa kata kaei kaei.
Kumta kan dei ruh ka lad ka lynti, kaba shisien shisnem, ban ïakmen ïasngew-bhalang bad ban ïalong kawei. Ka juh ka ‘bam’ ïa barohlang, kata, naduh ïa uba pahuh pahai tad haduh ïa uba kham kyrduh. Ka juh ruh ka bam tad naduh ïa uba khraw tad haduh ïa uba rit. Ka ‘bam’ pat de ruh kam dei ban duna. Kan nym duna katba uba pahuh pahai u dang ïainoh kylluid mynsiem, kum ka jingmanglang lane kum ka jingmang kyrpang, na ka bynta kiba kham kyrduh lane kiba kham duna ka jingioh. Kan nym kyrduh katba dang don kiba noh kylluid mynsiem bad noh ruh jar jar khlem da put turoi lane khlem da kwah ïa ka nam lymne ïa ka jingburom kaba kyrpang.U rit u ria lane uba duna ka ioh ka kot pat ruh un dang ïai ïashim bynta katba uba khraw batri uba don ba em um pat khohñioh mynsiem ban ïa kyrshut tyrpenglang bad u.
