Shillong, Nohprah 16
Ka Dorbar Shnong Madanriting ha ryngkat ka jingïatreilang bad ka Village Defence Party (VDP), Seng Kynthei bad Seng Samla ka shnong kum ka sienjam ban tehlakam ïa ka jingdie kyiad beaiñ hapoh u pud u sam ka shnong, ka la leh da ka kam myn ha ka 13 tarik u Nohprah, 2025 da kaba kyndang ïa kawei ka dukan harud surok bah kaba hap ha dong Mawblei.
Kane ka jingïoh kem kyiad ka dei na ka jingbuddien kitei ki kynhun kiba trei na ka bynta ka bha ka miat ha shnong ha thaw. Ka jingïoh kem ka dei kaba la i shyrkhei haduh katta-katta bad ym lah ban mutdur ba dei tang na kawei ka dukan.
La ong ba katei ka kyiad kaba la bun spah bilor la pynpoi ha ka sngi Saitjaiñ bad buh ban die pynlut pat baroh tang ha ka sngi kaba bud kaba dei ka sngi U Blei.
Na ka liang ki nongïalam shnong, VDP, Seng Kynthei bad Seng Samla ha ka step 16 tarik u Nohprah, 2025 ki la shim ïa ka rai ban theh khongpong ïa ka kyiad baroh na kine ki bilor ha katei ka shnong.
Ha shwa ka jingïatheh khongpong ïa ki bilor kyiad, ki nongïalam shnong ha ka jingïalam u Bah Ricky Lyngdoh, Rangbah Shnong ki la pynmih jingmaham ïa kiba mlien ïa ki kam die kyiad beaiñ ha kaba lada lap biang, ka kuna kan dei shi lak tyngka.
