Jowai, Nohprah 17
Ki MDC ka Liang Pyrshah jong ka Voice of the People Party (VPP) ha Jaiñtia Hills Autonomous District Council (JHADC) kila pynlong ïa ka jingïakhih da kaba khang tala ïa ka khyrdop jong ka council ha ka 17 tarik Nohprah namar ka jingbym ïoh tulop ki MDC bad ki nongtrei ka council kaba la kynjoh sha ka 9 bnai mynta.
Lah ban kdew ba ha ka 10 tarik Nohprah ha ka por ba plie ïa ka ophis jong ka tnad taxation ha Khliehriat, u CEM ka JHADC Ma Thombor Shiwat u la pynbna ba ka Sorkar kala kular ban pyllait ïa ka tulop jong ka council shuwa ka Christmas.
Na ka liang ki dkhot VPP kiba la ai da ka jingthoh sha u CEM ban dawa pyllait ïa ka tulop ha kine ki khyndiat sngi, ha ka sngi Balang ka 17 tarik Nohphrah kila ïaid shakhmat ban pynlong ïa ka jingïakhih da kaba khang ïa ka khyrdop ka council.
Haba ïakren bad ki MDC ka VPP kiba don ha khyrdop, u Ma Moonlight Pariat u la ong ba ki kwah eh ban pyllait ïa ka tulop, bad ym lah ban leh eiei namar ka ïaid lyngba ka treasury.
U Ma Moonlight Pariat u MDC shimet na Jowai South bad uba long ruh u Executive Member, u la mih shakhmat ban leit sha ka jaka trei kumba ju long kumjuh u Dy CEM JHADC Ma Lasky Rymbai ruh kila rung shapoh ka ophis treikam ka council ryngkat bad ki katto katne ki ophisar.
“Lada phi ïakhih kumne kumno ki ophisar kin ïoh ban trei ïa ka kam”, ong u Ma Moonlight Pariat.
Hynrei ha ka por nohphai sngi, ki MDC ka VPP kila plie noh ïa ka khyrdop hadien ba ka Sorkar kala pyllait pisa 8 klur tam ban siew ïa ka tulop jong ki MDC bad nongtrei na ka bynta tang shibnai, la ong u Jamshaphrang Pohtam haba kren sha ki lad pathai khubor.
