Nongstoiñ, Nohprah 17
Hapdeng kiba bun ki jingud jingnam namar ka jingnang sniew bad synjor jong ka jingkieng Risiang ha West Khasi Hills kaba pynïasoh ïa ka surok Nongstoiñ – Maweit, mynta kan long lehse ka jingkyrmen ïa ki paidbah ha kaba la ong ba ïa kane ka jingkieng la mang 10 klur tyngka ban tei thymmai.
Ïa kane la pynthikna ruh da u Bah Methodius Dkhar, MLA ka Mawshynrut ha kajuh ka por kum u Myntri Sorkar haba pynpaw dang shen sha ki paidbah ha Risiang.
Lah ban kdew hangne, ba ka jingkieng Risiang mynta kala don da ki phew tylli ki snem bad kumba long mynta namar ka jingnang synjor bad la khang noh ban ïaid wat ïa ki kali heh.
Katkum ka jingpynpaw bad ka jingkren jong u Bah Methodius la ong ba ha ka por ba la mang pisa ïa ka ban pyntrei ïa ka surok Nongstoiñ Maweit, ka jingkieng Risiang ka khlem shah kynthup ban ïoh ‘sanction’ pisa ban shna thymmai namar ka jingbym dap ka pisa.
U la ong ruh ba hadien ba u la ïoh jingtip ba katei ka jingkieng ka khlem don lang ha ka ‘sanction’ jong ka surok, u la pyrshang ban buddien naduh u snem 2023 bad ïakren ruh ïa ki bor kiba halor namar khlem katei ka jingkieng ka surok lehse kam don jingmut.
“Ha kane ka kynti kaba nga kwah ban pynbna ba ïa katei ka jingkieng Risiang la lah ban pynïoh ïa ka mang kaba 10 klur tyngka ha kaba na ka liang jong ka World Bank kila wan ban thew ban woh bad ban pynbiang ïa ka DPR,” ong u Bah Methodius.
