Shillong, Nohprah 17
U Myntri Rangbah ka jylla u Conrad Sangma ha ka sngi Balang u la ïakynduh ïa ki Rangbah Shnong bapher bapher jong ka nongbah Shillong bad ki khap sor ban sngap ïa ka jingpynsngew jong ki halor ka jingeh kaba ki ïakynduh bad ïa ka jingdonkam kaba ki donkam ha ki shnong jong ki.
Ha kane ka sngi, ki Rangbah Shnong ki la pynsngew ïa ka jingeh kaba ki ïakynduh kum ka jingduna um, ka jingbym biang ki street light ha ki shnong ki thaw, ki nala bad ki lynti ki syngkien.
Na ka liang u Myntri Rangbah haba jubab ïa kine ki jingeh kiba ki Rangbah Shnong ki la pynsngew u la ong, ka Sorkar lyngba ki tnad bapher bapher ka pyrshang ban peit ïa ka jingeh kaba ki paidbah ki ïakynduh bad ban pynbiang ïa ki.
U la bynrap da kaba ong ba ki hap ban sdang naei re naei, hynrei ban ong ba kin leh lut baroh kan ym poi shaei shaei ruh. Hynrei ban sdang khyndiat pa khyndiat ki don ka jingkyrmen ba kin poi sha ka thong.
Haba ïadei bad ki wire kiba pur, u Myntri Rangbah u la ong ba ka Sorkar ka la ïakren halor kane bad ki la don ka jingthmu ban sdang na Secretariat hynrei hadien ba la ïakren bad ki ophisar ki la ïathuh ba kane ka projek ban tep ïa ki wire kan shim por da ki snem, bad ka jingblok kan jur lada ki sdang ban leh ïa kane.
Na ka liang u Conrad u la bthah ïa ki ophisar lyngba ka Shillong Municipal Board ban peit bad ban weng noh ïa kito ki wire ki bym trei kam shuh bad kumjuh ruh ban weng ïa kito ki post kiba la shu ieh khlem pyndonkam shuh.
Haba ïadei bad ki CCTV na ka liang u Conrad Sangma u la ïathuh ba ka Sorkar lyngba ka SMB ka jied ïa kumba sawphew tam ki shnong ban sdang ban pyndait CCTV, ha kaba ki don ki shnong kiba la dep don ruh ki shnong kiba khlem pat dep.
Haba ïadei bad ka jingkyrpad jong ki shnong kiba hap hapoh ka Mawlai ban pynbiang CCTV, u Myntri Rangbah u la ïathuh ba ka Phase ba nyngkong ka la ïaid bad ki don ki shnong kiba khlem kynthup lang hynrei ha kane ka phase kaba ar kaba kan sdang ha u bnai Kyllalyngkot jong u snem 2026 baroh ki shnong kiba khlem shah kynthup mynta kin sa ïoh ban rung lang bad kin sa ïoh ïa ki CCTV.
Haba ïadei bad ka jingpynbiang ïa ka umbam umdih na ka liang u Myntri Rangbah u la ong ba ka Sorkar ka trei ïa ka kam hynrei ka don ka jingjia kaba jia kumba long mynta ha kaba na ka liang ka jong u, u la peit hi da lade ïa ka kam bad u don ka jingkyrmen ba na ka liang ka tnad PHE kan lah ban pyndep ban pyndait ïa ki pipe um.
Shuh shuh haba ïadei bad ka jingai jingmut jong ki Rangbah Shnong ba ka SMB kan pyndap um ha ki tank lada jia ka jingduh um kaba neh bun sngi, u Myntri Rangbah u la ong ba ka jingai jingmut ka long kaba biang ha kaba u la bthah ïa u Chief Secretary ban pynrung ïa kane hapoh ka SOP khnang ba lada jia kum kine ki jingjia ba duh um ka SMB kan pyndap um ïa ki tank ha ki shnong, tang ban pyndap ïa ka jingdonkam jong ki ïing ki sem.
Ha kane ka sngi u Myntri Rangbah u la pyllait paidbah ïa ka City Beautification Drive da kaba sam ïa ki cheque sha ki Rangbah Shnong bad Secretary Shnong bapher bapher. Kumjuh ruh kum ka dak ban sdang ia kane ka prokram u Myntri Rangbah u la ai rong ïa ka jingker ha Mawroh kaba don hajan ka ophis jong ka shnong.
