Bengaluru, Nohprah:
Ka Karnataka ka la ïoh jingkheiñ ba ki la don kumba 2,809 ngut ki nongrep kiba la shim hi ïala kajong ka jingim ha kine ki lai snem ba la leit, ka sorkar jylla ka la pyntip sha ka Legislative Assembly,kum shi bynta ban pynskhem ba kum kine ki jingjia ki la nang hiar ha kine ki snem.
Ïa kine ki jingkheiñ la pynpaw lyngba ka jingthoh ba la jubab da u N Chaluvarayaswamy, Myntri ka tnad Agriculture, halor ka jingkylli ba la wanrah da u MLA ka BJP, u Aravind Bellad.
Katkum ka jingtip ba la buh hakhmat ka ïingdorbar, ki don 1,254 ngut ki nongrep kiba la ïap da kaba shim hi ïala kajong ka jingim ha u snem 2023-24, bud sa 1,178 ngut kiwei pat kida la kutlad ha u snem 2024-25. Ha une u snem 2025-26, ki don 377 ngut haduh mynta ka sngi bad baroh kiba thom haduh une u pur ki la poi sha ka 2,809 ngut.
Wat hapdeng ka jinghiar dang shen, u Myntri u la kam ba ka Karnataka ka don ha ka kyrdan kaba ar ha ka ri ha kaba ïadei bad ka jingpynïap ïalade jong ki nongrep, katkum ka jingkheiñ jingdiah jong ka National Crime Records Bureau (NCRB). Ïa ki jingtip ba bniah katkum ka snem bad ka distrik la ai sha ka ïing dorbar ha ki jingpynbna.
Halor ka jingsiew bai lutksan, ka sorkar ka la ong ba la siew jingïarap pisa sha ki katto katne ki longïing kiba la duh noh, katba ki jingsiew ha ki katto katne ki khep ki dang sahkut namar ki jingeh ha ka rukom treikam jong ka Direct Benefit Transfer (DBT). Kine ki kynthup ïa ki Bank Account kiba dang sahkut ne kiba la khang, ka jingbym lah ban pynïasoh ïa u Aadhaar, ka jingbym lah ban thum katkum ka NPCI bad ki Account kiba la sangeh treikam.
U Myntri u la pynthikna ba yn pyllait noh ïa ka bai lutksan ynda la pynbeit ïa kine ki jingeh, hynrei u la pynshai ba ki katto katne ki mukotduma kiba la rim ym lah ban siew namar ki jingkhang jong ka tnad pla tyngka.
U la pyntip ruh ha ka ïingdorbar ba, katkum ka hukum jong ka tnad pla tyngka kaba dang shen ha ka 6 tarik u Naiwieng, ka jingsiew bai lutksan ha ki mukotduma pynïap ïalade jong ki nongrep dei ban pynbeit hapoh khyndai bnai naduh ba jia ka jingjia.
Ha ki khep jong ka jingïap ba shu jia ryngkhat bad ka jingduna ha ki dkhot met, ki jingsiew ki dei ban pyndep hapoh hynriew bnai.
Watla ka kam ba ka long kaba khia bha, hynrei ka sorkar ka la pynskhem ba ki jingpynïap ïalade jong ki nongrep ki la duna haba ïanujor bad ki lai snem ba la dep, da kaba kyntait ïa ki jingkynnoh ba ki skhim sorkar ki la pulom bad ka la pynpaw ba ki jingïarap kiba dang ïaid shakhmat ki pyni ïa ka jingmih.
