Shillong, Nohprah 17
U Myntri ka tnad pule-puthi ka Jylla, Bah Lahkmen Rymbui ha ka Sngi Balang u la ong ba ka Sorkar Jylla ka dang pyrshang ban-ban jur ïa ka Sorkar Pdeng ban bteng ïa ka skhim SSA, naba ka jingpynsangeh ïa kane ka skhim, kan ban khia shuh ïa ka jingkit kaba T.500 klur ïa ka pla tyngka jong ka Jylla.
“Lada ka Sorkar India ka sangeh ne kam bteng shuh, ngin hap ban lut ïa baroh (T.235 klur), nalor ka jingpynkiew tulop ïa ki nonghikai ‘Adhoc’ bad SSA, ka ban wanrah shuh ïa ka jingban khia kaba haduh kumba T.100-300 klur ,” la batai u Bah Rymbui.
U la ïathuh ruh ha ki nongthoh khubor ba ka Sorkar Jylla ka ïakynduh jingeh ha ka ban weng ïa kane ka jingduna.
“Ka PAB ka la mynjur T. 235 klur, hynrei ka Sorkar India ka ai tang T. 139 klur, bad ka Sorkar Jylla ka hap pynlut T. 72 klur. Kine ki dei ki mat ki bym da long than kiba suk ïa ka tnad pule-puthi ne ka Sorkar ban pynbeit shisien leh,” u la ong.
Na ka liang u Myntri u la kyrpad ïa ki nongshim bynta ba kin sngewthuh ïa ki jingeh jong ka Sorkar bad ban ïatreilang ha ka ban weng ïa kine ki jingeh.
“Ngi don hangne ban shakri katba lah ïa ki paidbah. Ngim shong ne khmih tang ïa kawei ka mat, ngi iakynduh ïa kiba bun ki mat kiba donkam ban pynbeit,” u la ong.
U Bah Rymbui u la pyntikna ba ka Sorkar ka angnud ban pyndep ïa ki jingkular jong ka bad u la kyntu ïa baroh ban don ka jingïasngewthuh jingmut lang halor ka jinglong-jingman.
“Ngin pyrshang ban pynbeit ïa kine ki jingeh kawei-hadien-kawei, ha ryngkat ka jingkyrshan jong u Myntri Rangbah ka Jylla,” u la bynrap.
