Shillong, Nohprah 17
U Symbud Myntri Rangbah ka Jylla ba khmih ïa ka tnad pynroi sor, Bah Sniawbhalang Dhar u la pynpaw ba ka jingshim jaka na bynta ban buh ïa ki jaka bret ñiut bathymmai ha Shillong bad kiwei-kiwei ki distrik ‘Headquarter’ ka dang sahteng namar ki jingïakren kiba dang ïaid halor ka dor bad ki trai jaka.
“Ym pat don kano-kano ka jingpynsngew paidbah kaba la pynlong, kumta ngi dang hap ban ïakren ïa ka dor, bad ngi la thaw ïa ka komiti ban ïakren kaba la khlieh da u Deputy Commissioner ne Director ka tnad pynroi sor,” la ong u Bah Dhar ha ki nongthoh khubor ha ka Sngi Balang.
“Ka dor, lada ka ïa-biang lang na bynta baroh ar-liang, ngi lah ban ïaid shakhmat, hynrei lada ka dor ka heh shaba palat, kata ka la ïaid da kumwei pat,” u la ong.
Ha kaba ïadei bad ka jaka bret ñiut kaba la tyrwa ha Nonghali, u Bah Dhar u la ong, “Ka jingpynsngew paidbah ka la ïaid beit ïaid ryntih, bad ka bynta kaba kongsan mynta ka dei ka dor. Ngim lah ban ïakren ïa ka dor tad haduh bad lymda pyndep shuwa ïa ka jingpynsngew paidbah. Kumta, ka jingpynsngew paidbah ka la dep, bad mynta ngin sa ïakren bad ki trai jaka, kaba mut ka imlang-sahlang jong ka shnong Nonghali.”
U Bah Dhar u la ïathuh ruh haba ïadei bad ka jingshim jaka na ka bynta ki jaka bret ñiut ha kiwei pat ki distrik, da kaba ong, “Ha Ri-lum Jaiñtia, ngi dang hap ban pynithuh ïa ka jaka, hynrei ha Williamnagar bad Tura, la dep ban leh ïa kane, namarba ki la don katto-katne tylli ki jaka kiba la shim lypa, bad ki don katto-katne ki jaka kiba dang don ha ka jingpynkhreh ban pynithuh ïa ki jaka bathymmai.”
“Ngi dang pyrshang ban ïoh jaka ban buh ïa ki jaka bret ñiut ha baroh ki jaka sor jong ki distrik ha kylleng ka Jylla,” u la bynrap.
Ha Jowai, u Bah Dhar u la ong, “Ngi la pynithuh lai-saw tylli ki jaka, hynrei ngi dang hap ban pynbeit shuwa kano kaba lah ban leh na ka bynta ka jaka bret ñiut. Ki la don ar-lai tylli ki jaka, hynrei ki briew ki la pyrshah, kumta ngi la iehnoh ïa kata kawei, bad ngi dang wad ïa ki jaka kiba thymmai.”
Shuh shuh u Bah Dhar u la ban jur ïa ka jingthmu ba kongsan jong ka Sorkar ka long ban pyntikna ïa ka jingpynkhuid ïa ki jaboh-jabaiñ, da kaba ong, “Ngi pyndonkam ïa baroh ki lad ki lynti, bad ngi la lah ban pyntikna ba yn ym don jaboh ha ïew ha hat bad ha ki shnong ki thaw – kata ka dei ka jingthmu ba kongsan jong ngi.”
