Shillong, Nohprah 17
U Myntri ka tnat Public Health Engineering (PHE) u Marcuise N Marak u la pyntip ba la lah ban maramot ïa ka jingpei u ‘pipe’ um, kaba la ktah ïa ka jingpynpoi um sha ki paidbah mynta la 8 sngi kynthih.
U Marcuise u la ong ka daw ka jingkyrduh um ha ki katto katne tylli ki shnong ba hapoh ka sor Shillong ka dei na ka daw ka jingpei u ‘pipe’ um namar ka jingtrei shna surok ka National Highways & Infrastructure Development Corporation Ltd (NHIDCL) ha ki bynta ka 101 area, Upper Shillong bad ka tnad ka la maramot halor kane, hynrei ka long kaba shem shitom shibun namar ka jingpei ki ‘pipe’ um ka jia hapoh jong ka surok ba dang ïaid ka jingshna ka NHIDCL.
U la ong ba na ka liang ka tnad ka la trei shitom katba lah ban maramot ïa kitei ki ‘pipe’ um ba pei, hynrei namar ka jingdon jong u napoh ka surok ym lah shuh ban maramot, namar kata ka tnad kam don lad shuh da kumwei, kumta ka la thaw da kawei ka lad ban thep ‘pipe’ thymmai na kiwei pat ki bynta, kaba la shimpor ïa ka tnad ban pyndep haduh 8 sngi, namar ba kane ka jingthep ‘pipe’ ba thymmai ka jngai kumba 300 metre.
“Nga sngewthuh ba ki paidbah ki kynduh jingeh, hynrei ka tnad PHE ka khlem shongthait ban trei, wat hapdeng ka miet ka ïong ki Ophisar bad ki nongtrei ki la ïaleh shitom ban pyndep ïa ki ‘pipe’ um thymmai ban pynpoi um sha ki nongshong shnong” la ong u Marcuis N Marak.
U Marcuise ula pynpaw ba kane ka jingpei ki ‘pipe’ um lehse ka lah ban dei ha ka por ba pyntrei ïa ka surok bad u la kdew ïa ka jingduna ka jingïatreilang, ka jingïakren ha ka por ba dang pyntrei ïa ki kam, u la ban jur ba ka NHIDCL ka la dei ban pyntip sha ka tnad PHE ha shuwa ba kan pyntrei ïa ka jingtrei nalor ki pipe um.
U la ong ba ka tnad kan sa kyrpad ïa ka Sorkar Jylla ba kan thung ïa ka jingtohkit khnang ban tynrong ïa ka jingbahkhlieh bad pynkut ïa kum kine ki jingjia. “Ka jingtohkit ha ka kyrdan jong ka Sorkar kan ïarap ban lah tynrong ïa ka jingbahkhlieh bad ban pynthikna ba kum kine ki jingleh bakla kin ym jia shuh nangne sha khmat.
Haba ïadei ka jingsam um, u Myntri ula pyntip ba ïa ka um yn sa sdang ban pynpoi sha Shillong naduh ka janmiet sngi Balang katba ïa ki ‘pipe’ um ba pynïasoh thymmai dang donkam sa kumba 12 kynta bad kyrmen ba naduh ka sngi Palei yn sa lah ban pyllait um kumba ju long.
