San Mateo Atenco, Nohprah:
Ha kane ka khubor, la ong ba kawei ka liengsuiñ rit ka la leit hap bakla ha ki bynta phang Pdeng jong ka ri Mexico katba ka dang pyrshang ban hiar kyrkieh noh namar ki daw bym lah tip, ha ka Sngi Nyngkong, ha kaba 7 ngut ki la khlad noh ha kane ka jingjia ba sniewbok, la iathuh ka tnat State Civil Protection Coordinator jong ka Mexico.
Kane ka la jia ha San Mateo Atenco, kaba long ka thaiñ ba bun ki karkhana bad ki kam khaïi- pateng jong katei ka ri, kumba 3 Miles lane 5 Kilometer na ka Kad Liengsuiñ Toluca, kumba 31 Miles na ka phang West na ka nongbah pdeng jong ka Mexico.
Ki bor pyniaid ki iathuh ba la don 8 ngut ha ka por ba ki pynrung kyrteng ia kito kiba shong hapoh jong katei ka liengsuiñ rit, ha ryngkat bad 2 ngut ki dkhot treikam jong katei ka liengsuiñ. Hynrei hadien jong katei ka jingjia, la lap tang ia ki 7 ngut kiba shong hapoh jong katei ka liengsuiñ.
La iathuh ba katei ka liengsuiñ, ka la pyrshang ban leit hiar ha ki jaka phlang hynrei ka la kum leit tyngkhuh ia kawei ka tnum iing jong kawei ka kompeni, ha kaba, ka la wanrah ia ka ding kaba jur.
Watla katta, ki tnat tohkit ki dang wad bniah ban lap ia ka daw jong katei ka jingleit hiar kyrkieh jong katei ka liengsuiñ ha katei ka sngi.
U heh ka San Mateo Atenco, u Ana Muñiz, haba iakren bad ki lad pathai khubor, u la iathuh ba ka jingkem ding ha katei ka jingjia, ka la pynlong ia ki 130 tam ki nongshong shnong katei ka jaka, ba kin hap ban kynriah jaka noh.
