Shillong, Nohprah 17
Ka North Eastern Hill University Non-Teaching Staff Association (NEHUNSA) ka la kyntait ïa ka jingkam jong u Pro Vice-Chancellor, Prof S Umdor, ba ïadei bad ki jinglah treikam (achievement) ha ka samoi treikam jong u.
Ha ka kyrwoh ha ka sngi Balang, ka NEHUNSA ka la ong, “Ngi da kyndit bad sngew kynrum kynram halor ki jinglah treikam ba la kam da u Pro-VC barim, ha kaba u la ong ba hapoh ka samoi treikam jong u kum, ka ophis Pro-VC kala lah ban leh ïa ki kam kiba heh kynthup ka jingkyntiew kyrdan ïa ki nongtrei (Non-Teaching) staff lyngba ka Departmental Promotion Committee (DPC)”.
Ka NEHUNSA ka pynshai ba ym don satia ki nongtrei Non-Teaching kiba la ïoh kiew kyrdan, kaba long pyrshah ïa ka jingkam u Pro VC.
Ka Association kala kyntait ruh ïa ka jingkam ba la dep pynkhreh ïa ka jingpynbna laitkam ban thungkam ïa ki nongtrei Non-Teaching, haba pynpaw ba ka jingpynbna laitkam ba hashuwa, kala kut noh bad ka dei ka ban dang kheiñ kut ïa ka.
“Ngi kwah ban pynshai ba haduh mynta ym pat don ki nongtrei Non-Teaching staff kiba la ïoh kiew kyrdan, kaba dei kawei na ki mat bala leit rah hakhmat ka ophis jong ki bor ba dei khmih,” ong ka NEHUNSA.
Ka Association kala buh jingkylli ïa ka jingkam u Pro-VC, da kaba ong ba ka NEHUNSA kam don jingtip satia bala dep pynkhreh ïa ka jingpynbna laitkam ban thungkam ïa ki nongtrei Non-Teaching Staff.
