Shillong, Nohprah 17
U Symbud Myntri Rangbah ka Jylla ba khmih ïa ka tnad pynroi sor, Bah Sniawbhalang Dhar u la pynpaw ba ka jingpynkhuid ïa ka jaboh kaba la lang da ki snem ha ka jaka bret ñiut ha Marten ka la ïaid shaid-shaid, ha kaba la dep ruh ban tih palat 2 lak ton ka jaboh.
“Na ka bynta kaba thymmai, ngim pat lah ban pyndep. Katba ngi dang pynbeit ïa ka jaka kaba thymmai, hapdeng kane, ngi hap ban pynkhuid ïa baroh ki jaboh kiba rim da ka rukom pynkhuid ïa ki jaboh kiba la sah snem,” la ong u Bah Dhar.
U la bynrap ba ka jingpynkhuid ïa ka jaboh ba la lang da ki snem ka dang ïaid shakhmat, ha kaba palat 2 lak ton ka jaboh la dep ban pyndonkam biang, bad la antad ba sa kumba 1.8 lak ton kaba dang sah ban pynkhuid.
“Ha kane ka shisnem ba la dep, ka la long palat 3-4 lak, kumta mynta palat 2 lak la pyndonkam biang, kumta lehse 1.8 lak ka dang sah, bad kyrmen, hapoh ka por kaba lyngkot, ngin sa lah ban pynkhuid ïa ki jaboh kiba la rim na ka jaka bret ñiut jong ka Marten,” u la ong.
U Bah Dhar u la pynpaw ïa ka jingsngewskhem ba ïa ka kam yn pyndep hapoh ka por ba la buh, kumba la ïasoi ha ka ‘tender’.
“Nga tikna ba kin sa lah ban pyndep ïa ka jingpynkhuid ïa ka jaboh kaba la rim na Marten hapoh kane ka por ba la buh katkum ka jingïateh ha ka ‘tender’,” u la ong.
Ha kajuh ka por, u la ai khublei ïa ki nongshong shnong kiba la ai ka jingïatreilang bad ka jingkyrshan ha ki jingpyrshang ban pynkhuid ïa ki jaboh-jabaiñ.
“Nga ai khublei shi kat dei ïa baroh ki shnong naba ngi la leh ïa ki prokram pynsngewthuh paidbah na ka tnad, bad ki ïatreilang bha. Ngi ai khublei shi kat dei eh ïa baroh kito ki shnong kiba long shi bynta jong kane kla jingthmu ban pynlong ïa ka sor kaba khuid ba suba,” u la ong.
Shuh shuh u Bah Dhar u la kyrpad ïa ki paidbah ban bteng ha ka ban pynïakhlad ïa ki jaboh kiba lah ban pyut bad ki bym lah ban pyut, da kaba ong, “Ngi la buh bun ki ‘Centre’ ha ryngkat ki mashin rit kiba thymmai, khamtam, ngi la kyrpad ïa ki ban pynïakhlad ïa ki jaboh kiba lah ban pyut bad ki bym lah ban pyut. Kum kine kiei-kiei kiba rit ki don shibun kiba lam sha ka jingmanbha.”
