Shillong, Nohprah 17
Ki khun ki hajar ka Hima Langrin ki la leit ban dawa na u Chief Executive Member (CEM) ka Khasi Hills Autonomous District Council (KHADC) ba u dei ban weng noh ïa u Bah Nangtei Sing Syiemiong kum u Syiem ka Hima Langrin namar haduh mynta ki kynnoh ba um pat lah ban ai ïa ka jingkheiñ kaba biang.
Kane ka jingdawa ki khun ki hajar ka dei namar kim ïoh shuh ïa ka jingshaniah ïa une u Syiem.
Ha kane ka sngi ki khlem ïoh ka lad ban ïakynduh ïa u CEM bad U EM ba dei peit ïa ka tnad Elaka hynrei ki la shu leit buh ka jingthoh.
Haba ïakren bad u Bah Faindness Syiemiong u la ïathuh ba ki khun ki hajar kim don shuh ka jingshaniah ïa u Syiem ba la shah pynhiar shuki teng ha ka KHADC bad dei ban weng shi syndon khnang ba ki khun ki hajar ka hima kin imsuk imsain.
Shuh shuh ha ka dorkhas ba la thoh sha u CEM bad EM ba kane ka jingdawa jong ki ban weng noh ïa u Syiem ka dei ba bunsien bad kyrmen ba na ka liang ka Council kan weng noh shisyndon khnang ban wanrah ïa ka suk ka sain khamtam ban pynneh ïa ka khyndew ka shyiap ka riti dustur bad ka longhok longtrai jong ka hima.
U la ïathuh ba ki la dep wan ai jingthoh sha ka ophis ka KHADC ha u bnai Risaw ban weng noh ïa u Bah Nangtei kum u Syiem.
U la kyrpad ïa u CEM bad EM ba kin ai noh ïa ka rai khnang ba kin sngewthuh.
U la pynkynmaw ba ha u snem 2023 une u Syiem u la shah weng namar u la pyndonkam bakla ïa ka pisa kaba khadsaw klur tam jong ka Hima haduh mynta um lah ban ai jingkheiñ ba thikna.
