Kolkata, Nohprah:
Ka kynhun nongïalam jong ka seng TMC ka la rai ban bthah ïa ki agent jong ka kiba don ha ka kyrdan jong ki Booth ban pynlong ïa ka jingkhmih bniah kaba thymmai, kaba ïaid haman ki thliew ïing ban lum ïa ki kyrteng jong ki nongthep vote kiba la shah pyndam ha Bhabanipur, ka konstitwensi jong ka Myntri Rangbah ka West Bengal, ka Mamata Banerjee, hadien ba la weng noh ïa ki nongthep vote haduh 45,000 ngut hapoh ka jingtreikam jong ka SIR.
Katkum ka jingkheiñ jong ka Election Commission, ka Bhabanipur ka don haduh 2,06,295 ngut ki nongthep vote haduh u bnai Kyllalyngkot 2025. Ki draft roll mynta ki don 1,61,509 tylli ki kyrteng, kaba pyni ba 44,787 ngut ki nongthep vote, kata jan 21. 7 percent ki nongthep vote, ki la shah weng noh.
Ka Commission ha ka sngi Ba-ar ka la pynmih ïa ki thup kyrteng jong ki nongthep vote jong ka West Bengal hadien ka jingpynkylla kaba kyrpang (SIR), da kaba pyndam noh ïa ki kyrteng jong palat 58 lak ngut ki nongthep vote halor ki nongrim bapher bapher, kynthup ïa ka jingïap bad ka jingwan buhai shnong, bad ban shim biang ïa ki kyrteng jong ki nongthep vote ha kylleng ki distrik bad ki khappud hashwa ka ilekshon Assembly jong u 2026.
Ka seng TMC ka la pynpaw ka jingsngewsih namar ba bun ki nongthep vote ki la shah buh dak kum kiba la ïap, la kynriah jaka ne pynkylla ne pep leit thep vote da ka kynhun ba dei khmih ha ki kam ilekshon.
“Ki nongïalam jong ka seng ki la kren shai ba ym dei ban pyndam ïa ka kyrteng jong u nongthep vote uba biang ha kano kano ka jinglong. Man la ka kyrteng kaba la pyndam dei ban pynshisha da ka met,” la ong ka tyllong khubor kaba la wan na ka seng TMC.
Ka Bhabanipur ka kynthup ïa ki Kolkata Municipal Corporation wards 63, 70, 71, 72, 73, 74, 77 bad 82. Ki tyllong khubor ki ïathuh ba ki ward 70, 72 bad 77 ki la buh jingthoh khamtam eh ïa ki jingshah pyndam, ha kaba ka ward 77, ka dei ka jaka ba la pynlong ïa ki rit paid ban shah ktah, ha kaba ka la pynlong ban wad ha ka por ba la pynlong ïa ka jingleit khmih bniah.
Ka Bhabanipur, kaba dei ka konstitwensi kaba bun ki nongshong shnong, ka don shibun ki nongshong shnong kiba wan na Uttar Pradesh, Bihar bad Odisha. Da ka jingbishar halor ki jingdawa bad ki jingpyrshah, kiba la khmih lynti ba kin sdang shen, ka seng, ka la bthah ïa ki nongïalam ka thaiñ, ba kin ïeng hajan ki nongthep vote, kiba shah ktah ha ka por ba pynshisha.
Ka TMC ka la kyrpad ïa ki unit ba marjan ban bteng ban pynïaid ïa ki camp ‘May I Help You’ ha ka kyrdan jong ki para marjan ban ïarap ïa ki briew ha ki kot ki sla, ka jingpyndap phorm bad ki jingsngap, bad ka la ong ba ki nongtrei mon sngewbha ki dei ban leit jngoh ïa ki ïing lada donkam.
Ki jingjia ha Bhabanipur ki wan hapdeng ka jingpyndam kaba la saphriang bha ha kylleng ki bynta ba shaphang Shathie jong ka Kolkata.
Ki Draft Roll ki pyni ba saw tylli ki bynta ba pawnam ha ka saiñ pyrthei, ka Bhabanipur, Kolkata Port, Ballygunge bad Rashbehari baroh lang ki la ïoh ban pynduh palat 2.16 lak ngut, kata jan 24 percent na ki nongthep vote jong ki baroh.
Haba sdang ïa ka SIR, kine ki seat baroh lang ki don kumba 9.07 lak ngut ki nongthep vote.
