Shillong, Nohprah 18
Ka Voice of the People Party (VPP) ka la byrngem ban pynlong da ka jingïakhih paidbah lada na ka liang jong ka Sorkar ka dang pynslem ban sei paidbah ïa ka kaiphod jong ka Reservation Policy (RP).
Lah ban pynkynmaw ba hynriew bnai mynshwa kata ha ka 13 tarik u Jylliew, 2025, ka Expert Committee on Reservation Policy ka la dep ban aiti ïa ka kaiphod jong ka sha ka Sorkar Jylla, hynrei ka Sorkar Jylla haduh mynta kam pat sei paidbah ïa katei ka kaiphod.
Kumta na ka liang jong u Bah Ardent Miller Basaïawmoit, President jong ka VPP bad MLA ka Nongkrem Konstitwensi uba la pynlong da ka jingïakhih shah thngan ha u snem 2023 ban dawa pynbeit ïa ka Reservation Policy, mynta ka kynti u la mih shakhmat ban ong ïa u Conrad K Sangma, Myntri Rangbah ka Jylla ba lada ka dang shim por ban sei ïa katei ka kaiphod, ka VPP kan pynlong da ka jingïakhih paidbah.
Kum ban shu kdew ba na ka jingïakhih shah thngan u Bah Ardent, ka Sorkar Jylla ka la thaw ïa ka Expert Committee ban peit bniah ïa ka jingdawa pynbeit ïa ka State Reservation Policy ha ka 12 tarik u Nailur, 2023 ïa kaba la khlieh da u Justice (Retired) Mool Chand Garg.
Hadien ka jingaiti ka Expert Committee ïa ka kaiphod, la ïoh jingtip ba ka Sorkar Jylla ka la bthah ïa u Bah DP Wahlang, IAS, Chief Secretary ha katei ka por bad ki ophisar rangbah ban khmih bniah ïa ka kaiphod ha shwa ban rah ïakren ha ka jingïalang ka Kynhun Myntri bad hapoh ka ïingdorbar thawaiñ ka Jylla.
Ha ka video, u Bah Ardent u la ong ba ka Sorkar Jylla ka sngap jar-jar halor kane ka kaiphod watla na ka liang ka VPP ka la phah jingpynkynmaw la bun-bun sien.
