Chennai, Nohprah:
Ka Executive Committee jong ka kynhun ba la ïalam da u S Ramadoss ka Pattali Makkal Katchi ka la dawa ban tohkit da ka CBI pyrshah ïa u Anbumani Ramadoss uba dei u khun jong u S Ramadoss. Kane ka dei kawei na ki 13 tylli ki Resolution ba la pdiang ha ka jingïalang jong ka komiti ha ïing sah jong u nongseng ka seng u Ramadoss ha Thailapuram ha Villupuram distrik.
Ka Resolution ka la ong ba ka CBI ka hap ban tohkit ïa ka rukom leh thok kaba la kynnoh ba u Anbumani u la leh ban pyrshang ban synshar ïa ki nongïalam ka seng bad la kynnoh ba u la thok ïa ki kot ki sla kiba la pyndonkam ban ïoh ïa ka shithi kaba mynjur na ka Election Commission jong ka Ri India. Ka la pynrem ïa ka ECI kaba la pynmih ïa kum kane ka shithi sha u Anbumani.
Ka jingïalang ka la khot ïa katei ka kynhun ba la ïalam da u Anbumani kum ka “fake party” kaba pyndonkam bakla ïa ka kyrteng jong ka PMK bad la ong ba u khun uba la shet kylla ïa la u kpa un shet kylla ïa ki nongtrei ka seng bad ïa ki paidbah ruh kumjuh.
