Shillong, Nohprah 18
U President ka FKJGP Sengkmie, Bah Dundee Khongsit u la pynpaw ba ka jingma ka ap ïa ka jaidbynriew bad ïa ka Jylla baroh kawei lada ka Sorkar Assam kan kyndang lut ïa ki muslim ki bym biang kot biang sla namar ïoh ki wan buhai shnong sha Meghalaya.
Haba ïakren bad u Bah Dundee u la ong, ka jingma ïa ka jingrung kiwei ki jaidbynriew ka dei ka jingbym ïoh ïa ka Inner Line Permit namar ka jingtlot ka Sorkar Jylla haba kam lah ban pynkohnguh ïa ka Sorkar India haba la dep mynjur ha ïingdorbar thawaiñ. U la ong ba lada ka don ka ILP kan shngaiñ ïa ka Jylla hynrei lada ym pat don ka ILP kan buh jingma ïa ka Jylla.
U la ong biang ba ka Sorkar ka sdang ban khohreh biang ïa ka ILP tad ynda ki sengbhalang ki pynlong ïa ka jingïakhih.
U la pynpaw ka jingsngewkmen haba ka seng ka pynlong ïa ka jingïalang bad ki dorbar shnong, kiba la kular ban nym ai No Objection Certificate ïa ki bar jylla ha ki kam khaïi lada don ki paradoh kiba la lah ban trei ïa ka kam.
“Ngi sngewthuh ba ka ILP ka dei ban ïoh jingmynjur na ka Sorkar India hynrei lada ka Sorkar Jylla ka shimkhia kam don jingeh namar la dep mynjur ha ïingdorbar thawaiñ,” u la ong.
Shuh shuh u la ong ba ha Manipur ki MLA ki ju ïakren haduh lai sien ïa ka aiñ ILP na bynta ban phah sha ka Sorkar India, kumta u la ai jingmut ïa ka Sorkar Jylla ba kan ïakren biang ïa ka aiñ ILP ha ïingdorbar ban pynkynmaw sha ka Sorkar India.
U la ong biang, haba don hapdeng ka jingïakynad haba ki rung sha Manipur ka long shngaiñ bha namar ki la dep pynrung kyrteng ïalade.
Shuh shuh u Bah Dundee u la pynkynmaw ba ka jingshah pynïap u Raja Raghuvanshi sha Sohra lada la don ka ILP ki pulit ki la suk ban wad ïa kito ki briew kiba donkti namar ki la pynrung kyrteng ïalade shwa ban rung shapoh ka Jylla.
