Shillong, Nohprah 18
U Bah PT Sawkmie, MLA barim ka Mawlai ha ka sngi Balang u la ïoh ban lehkmen Khristmas bad ki Driver Mawlai kiba don hapoh ka lama jong ka Motphran Auto Rickshaw Owner’s and Driver Association (MARODA) bad ïa kane ka jingïalang la pynlong ha phyllaw jong ka ophis Mawlai Phudmuri.
Kane ka jingrakhe ïa ka Advance Khristmas ka long ruh kum shi bynta jong ka jinglehkmen Jubili Rupa ka jingdap 25 snem jong ka Association ki nongniah kali.
Haba ai jingkren kum u kongsan u Bah PT Sawkmie u la kyntu ruh ïa ki nongñiah kali haba ki kit ïa ki nongleit nongwan (passenger) ki dei ban sngewthuh ba ki kit ïa ki mynsiem lane ka jingim briew bad ka jingim jong ki nongleit nongwan ka shong ha ki kti jong ki nongñiah kali, kumta ki nongñiah kali ki dei ban shim ka jingkitkhlieh khnang ban lait na kino-kino ki jingjia.
Shuh-shuh u la ong, ki jingjia ha ka jingim ki long kum ki jingtynjuh jong u Blei ha ka jingim jong man u briew, hynrei kaba kongsan ka long ban pynkyrpang ïalade bad ban ïai-neh. “Ka Khristmas ha ka jingim Khristan ka dei ka ba kordor, ka Khristmas kam shong ha ka jingduk ne jingriewspah hynrei ka shnong ha ka mynsiem ba ngi pdiang sngewbha ïa ka jingwan longbriew u khun u Blei sha ka sla pyrthei” la ong u Bah PT Sawkmie
U Bah PT u la ai khublei Khristmas bad snem thymmai bad kitbok kit wriang ïa ka MARODA ba kan nang lah ban jam shakhmat ha ka ba pynlong ïa ki prokram bapher-papher kaba kin sa pynlong kum shibynta jong ka jingrakhe ïa kane ka Jubili Rupa.
Ha kane ka sngi la ïoh ruh ïa ka khubor Khristmas na ka ktien u Blei ba la sam da u Bah Jehan Marsing ki jingrwai ba pynshongshit shongshngaiñ na ki kynhun ki khun samla.
