Jowai, Nohprah 18
Ki pulit ka Jylla ki la ïoh ban kem noh ïa saw ngut ki nong Bangladesh kiba la wan rung tuh sha India lyngba ki jaka khappud na West Jaiñtia Hills ha ka step shiteng synñia jong ka 18 tarik Nohprah.
Ka khubor pulit ka ïathuh ba ki bor pulit napoh ka thanad Amlarem ki la pynlong ïa ka jingtalasi ha Lad Iew Amlarem ha ka por kumba 12:30 mynmiet hadien ba ki la pynïeng ïa kawei ka kali kaba la pynher sted bha kaba wan na ka thaiñ Dawki.
Hynrei, la ïathuh ba kane ka kali kam shym la sangeh satia hynrei ka la phet krad na katei ka jaka talasi kaba la pynlong ïa ki pulit ba kin hap ban beh thong. Hadien ba la poi ha Amsarin la lah ban pynsangeh noh ïa kane ka kali bad ha ka jingtalasi la lap ïa saw ngut ki nong Bangladesh ïa kiba la wanlam noh shapoh thanad na ka bynta ban pynlong ka jingtohkit.
Ki pulit ki la pyntip ba kine ki saw ngut ki nong Bangladesh ki dei kiba la tip kyrteng kum u Saidul Gasi (18), na Gali Gang; u Lemon Shutdar (24), na Kallia, u Rison Hussain (18), na Jasur bad u Rubel Sheik (27 snem rta) na Gasi Road, baroh kidei na Bangladesh. Ki pulit ki ïathuh ba kine ki nong Bangladesh ki la wan rung tuh sha India na ka thaiñ Dawki da ka jingthmu ban leit sha Assam khlem da don ïa ki kot ki sla kiba biang.
La ong ruh ba ïa kane ka kali kaba don ïa u numbor ML04-D-9309 (tourist) lem bad ïa u nongñiah uba kyrteng u Chemphang Rasmut, 43 snem rta uba dei na ka shnong Shkentalang la rah noh da ki pulit.
Mynta ki pulit ki la register case pyrshah ïa kine ki nong Bangladesh hapoh ki kyndon jong ka Foreigners Act lem bad kiwei ki kyndon ka BNS, ha kaba la ïalam noh ïa ki hakhmat ka ïingkashari.
