Shillong, Nohprah 18
U Bah Noverius Lyngdoh uba long u Assistant Chief Engineer ka Public Work Department u la ong ba ka jaidbynriew ka donkam ïa ki khun samla ba kin shimbynta ha ki eksam IAS, IPS, MCS bad pynshlur ruh ïa ki khun samla ba kin ïakhun ïa kine ki eksam.
Ïa kane u la pynpaw ha ka jingai jingkren jong u kum u kongsan ha ka jingïalang plie ïa ka jingrakhe dap 20 snem ka Seng Samla Mawlai Pyllun, ha ka jingïalang ba la pynlong ha Mawlai Nongkwar Secondary School.
U Bah Noverius haba kren ha ka jingïalang u la ong, kum ka seng ha ki 19 tylli snem ba ka ïaid lynti ka ïakynduh ïa ki jingeh bad ki jingbymlah ban pynurlong ïa kino-kino ki jingdonkam hapoh ka shnong ka thaw, hynrei kine kiei-kiei ki dei ki mawjam kiba ïalam lynti ïa ka seng ban poi sha ka thong.
U la ai jingïaroh ïa ka jingshimkhia ka Seng Samla ban pynlong ïa shibun ki kam na ka bynta ban kyntiew bad ban ïalam lynti ban pynbeit ïa ka lynti ïaid jong ki khun samla ka shnong Mawlai bad u la kyntu ïa ka SSMP ban ïaid shakhmat ha ka ban trei ïa ki kam ba bha na ka bynta ka imlang ka sahlang.
Nalor kata u Bah Noverius u la pynshlur ïa ki khun samla ban ïakhun ïa ki eksam IAS, IPS, MCS bad kiwei, da kaba kdew ba mynta la bun snem ym ju don shuh ki khun samla Khasi ki ban ïoh ïa kitei ki kyrdan bad kyrmen ha ki sngi ki ban sa wan na ka jaidbynriew kin mih ki ophisar Sorkar ha ki kyrdan ba halor.
