Shillong, Nohprah 18
Ka Ministry of Road Transport & Highway (MoRTH) ka Sorkar Pdeng, kala kular ïa ka Sorkar Meghalaya ba kan sa thaw ïa ki lad ki lynti ban shna pyndep ïa ki surok ka skhim Special Accelerated Road Development Programme-NE (SARDP-NE) kiba sahteng ha Jylla namar ka jingpynkut ïa ka skhim.
Ïa kane ka jingkular la ai da u Myntri ka MoRTH u Nitin Gadkari ha ka jingïakynduh bad u Myntri Rangbah ka Jylla, Conrad K Sangma lem bad u Symbud Myntri Rangbah ba khmih ïa ka tnad PWD, Bah Prestone Tynsong kaba long ha ka sngi Ba-ar ha New Delhi.
Hadien ba wan phai na Delhi, u Symbud Myntri Rangbah u la pyntip ba ka Sorkar Pdeng kala pynkut noh ïa ka skhim SARDP-NE bad kane kala buh ha ka jingeh ïa ka Jylla ba kan lah trei pyndep ïa ki artylli ki project surok jong kane ka skhim-ka surok Nongstoiñ-Wahkaji-Phlangdiloin-Ranikor bad ka surok Nongstoiñ-Rambrai-Kyrshai ka ban pynïasoh bad ka Chegaon, Assam.
U Bah Prestone u la pyntip ba ïa ka wat ba nyngkong jong kine ki projek la dep ban pyntrei hynrei dei ha ka wat ka ba-ar kaba sah namar ka jingpynkut noh ïa ka SARPD.
“Ngi la kyrpad ïa u Myntri ka Sorkar Pdeng ban pynrung noh ïa kitei ki artylli ki projek ha kano-kano ka skhim khnang ban ïoh shna pyndep noh na ka bynta ka jingmyntoi bad pynsuk ïa ka leit ka wan ki paidbah,” u la ong haba pyntip ba u Myntri u la ai ka jingkular ban sa wad ïa ki lad ki lynti ban pynïoh skhim ba kyrpang ïa kine ki artylli ki surok.
U Bah Prestone u pyntip ba ha kane ka jingïakynduh, la ïakren ruh halor ka surok High Speed Corridor ka ban sdang na lad Umroi, Umiam sha Malidor bad u Myntri u la pyntip ba u la dep bthah ban pyndep kloi noh ïa ka sorjamin jaka khnang ban ïoh shna DPR bad ban khot tender noh.
“Ngi la ïakren ruh ïa ki bynta jong ka surok hajan ka ICAR kaba don ïa ka Botanical Survey of India (BSI) bad ka Botling Plant ka Indian Oil Corporation,” u la ïathuh haba pyntip ba u Secretary ka MoRTH un sa lum ïa ka jingïalang bad ka BSI lem bad ka IOC ban pynbeit ïa kane ka kam.
Nalor kane, u pyntip ba ka Sorkar kala rah ïakren ruh ïa ka mat ba ïadei bad ka jingshna ïa ka jingkieng ha wah Brahmaputra ka ban pynïasoh bad ka Phulbari. Kane ka jingkieng kan hap ha ka surok 4-Lane kaba pynïasoh ïa ka West Bengal bad ki jaka ri thor ka ri-lum Garo.
“Kane ka jingkieng kan dei kaba jrong tam ha ri India, kaba dei ka 4-lane. Ka jingpyntrei kala jan dep artad ban poi haduh ha Phulbari. Ka jingeh hangne ka long ba ka Phulbari ka don ïa ka surok kaba rit bad ngi la kyrpad ban pynkylla noh ïa ka surok Phulbari sha ka 4-lane,” ong u Bah Prestone haba ïathuh ba u Nitin Gadkari u la bthah ïa u Secretary ka MoRTH bad ïa ki ophisar ba kin khmih bniah ïa kane ka jingtyrwa.
Ka Fly-Over ha Shillong ruh ka dei ka mat kaba la mih ha kane ka jingïakynduh bad la ïakren ïa ka jingdonkam ban pynpoi ïa ka Fly Over haduh Barik Point, kaba mynshuwa la tyrwa ban pynkut tang ha Anjali Point.
“U Nitin Gadkari u la bthah ïa ki ophisar ka NHIDCL bad ïa ka Ministry ba kin bishar bad leh ïa kaba donkam khamtam ba bun na ki jaka jong kane ka projek ki dei kiba hap hapoh ka Defence Land,” ong u Bah Prestone haba pyntip ba ka NHIDCL kan sa shimkhia ïa kane ka kam bad kan sa khot ïa ka tender tang mar syn ïoh shimti ïa ki jaka.
