Shillong, Nohprah 18
Ha ka sngi Palei, arngut ki dkhot ka seng kiengatiar Hynñiewtrep National Liberation Council (HNLC) kila shah kem halor ka jingdonkti ban pynbthei bom IED ha ka step phyrngap jong ka 15 tarik Nohprah ha ka jaka treikam ka Dhar Company, kaba don ha Shymplong, East Jaiñtia Hills.
Kane ka jingpynbthei bom kala pynjulor ïa ka kali kit um hynrei ym shym la don satia ka jingïap briew, kaba long pyrshah ïa ka jingkam ka HNLC.
“Arngut ki dkhot ka HNLC kila shah kem. Ki dei ki Over Ground Workers (OWG) bad kila kubur ïa ka jingdon kti ha kane ka kam pyntriem,” la ong uwei u heh pulit.
U Superintendent of Police ka EJH, u la pynthikna ba ka jingtohkit mynta ka dang ïaid shakhmat haba pyntip ba ki don shibun kiei-kiei ha lyndet kane ka jingjia haba ïathuh ruh ba ki pulit kin sa nang kem ïa ki briew ba donkti ha kane ka kam.
“Ka jingtohkit ka dang ïaid mynta bad katto katne ki kynhun kila tohkit ban lap ïa kiei-kiei baroh,” u la ong.
Ka HNLC kala kam ïa ka jingdonkti haba pynpaw ba ka pynlong sohpdung ïa ki nongkynti jong u Symbud Myntri Rangbah ka Jylla, Bah Sniawbhalang Dhar namar ka jingkyntait ban siew ïa ka pisa ba ka seng ka dawa.
U General Secretary ka HNLC Bah Sainkupar Nongtraw u la pynpaw ïa ka jingsngewlem sha ka ïing jong une u briew ba ïap haba kam ba ka seng kam don jingthmu ban shim ïa ka jingim briew.
Ki pulit kila kyntait ïa ka jingkam ba ïap briew ha kane ka jingpynbthei bom bad ong ba ka jingkam ka long kaba bakla lut.
“Ka jingkam ba don ka jingbthei bom IED ka dei kaba shisha hynrei ka jingkam ba ïap briew ka dei kaba bakla,” ong u SP.
