Khliehriat, Nohprah 18
Shi sngi shuwa ka Public Hearing kaba la khot pynlong da ka Meghalaya State Pollution Control Board (MSPCB) na ka bynta ban pynïeng ïa ka karkhana thymmai ha Daistong, Elaka Nongkhlieh, East Jaiñtia Hills District, ka Khasi Students’ Union, East Jaiñtia Hills District Unit (KSU-EJHDU) kala hiar sha kane ka shnong ban pynsngewthuh ïa ki paidbah ïa ka jingdonkam ban pyrshah ïa ka jingwan kane ka karkhana dewbilat thymmai.
Kane ka Public Hearing la khot ha ka 19 tarik Nohprah 2025 ha ka shnong Daistong.
Kane ka karkhana pynmih dewbilat ba thymmai ka dei kaba la tip kum ka M/S Shree Cement Plant Limited bad ka thmu ban pynmih ïa u clinker 0.95 million Tonnes Per Annum (TPA) bad ka dewbilat 0.99 million TPA, kynthup ka Captive Power Plant ba 15 Mega Watt, Waste Heat Recovery System (WHRS) ba 7 Megawawatt), bad DG sets.
Ka kyrwoh na ka KSU East Jaiñtia Hills District Unit, kala pynpaw haba kila poi ha katei ka shnong kila shah khanglad ban pynlong ïa ka jingïalang pynsngewthuh paidbah ha ki nongshong shnong kiba kyrshan ïa ka jingwan kane ka karkhana dewbilat thymmai.
Hadien ka jingpyrshah ka KSU ha ryngkat ki paidbah nongshong shnong ka Daistong ki la pynlong ïa ka jingïalang sha kawei ka jaka bad kala long kaba ïaid beit ïaid ryntih.
Ka phang jong kane ka jingpynsngewthuh paidbah ka long “Em ïa ka Public Hearing, Em Em ïa ka Shree Cement Ltd”.
Shuwa kane, ka KSU Khliehriat Circle ha ka 17 tarik Nohprah kala sam ïa ki kot lyngkdop ha ka Elaka Nongkhlieh ban pynshai bad pynsngewthuh sha ki paidbah ka Shnong Daistong halor ka jingshah ïuhroit bad ka jingshah ktah na ka jingwan ka karkhana pynmih dewbilat.
