Nongpoh, Nohprah 18
Hadien kiba bun ki kynrum kynram kiba la ktah shikatdei ïa ka rukom treikam jong ka Elaka Nongpoh Sirdarship, ka Khasi Hills Autonomous District Council (KHADC) kala thung syndon ïa u Bah Luistar Lyngdoh kum u Acting Sirdar ban pyntyllun ïa ki kam jong ka Elaka.
Ïa u Bah Luistar Lyngdoh la wan ban pynskhem bad pynbam smai da u Bah Denzil Raynard Chen, Executive Member ka KHADC ba dei khmih ïa ka tnad Elaka ha ka sngi Balang ha phyllaw jong ka shlem treikam ka Elaka kaba don ha Pahamsyiem, Ri Bhoi District.
Ha kane ka sngi pynskhem bad pynbam smai ïa u Bah Luistar Lyngdoh kum u Acting Sirdar ka Elaka Nongpoh Sirdarship la wan ban sakhi lang ruh da u MLA ka Umsning, u Dr Celestine Lyngdoh, u Executive Member ka KHADC ba dei khmih ïa ka tnad Water Resources & Fisheries u Bah Isynei Hinge, ka MDC na Nongpoh Kong Rona Khymdeit nalor kiwei kiwei ki nongïalam na ki Raid bapher bapher kiba hap hapoh ka jingkhmih ka Elaka Nongpoh Sirdarship, ki nongïalam sengbhalang ryngkat bad ki khun ki hajar.
U Bah Luistar Lyngdoh ha ka jingkren ka jong u hadien ka jingpynskhem bad pynbam smai, u la pynpaw ba kum u Acting Sirdar jong ka Elaka, u kwah ban don ïa ka jingïatreilang jong ki Lyngdoh, ki longsan mansan bad ki khun ki hajar jong ka Elaka hi baroh kawei na ka bynta ban pyntyllun bad pynïaid beit ïa ki kam ki jam jong ka synshar ka khadar ka Elaka.
Na ka liang u Bah Denzil Raynard Chen, u Dr Celestine Lyngdoh ha ka jingkren ka jong ki, ki la pynpaw ïa ka jingsngewkmen ba la lah ban pynskhem noh ïa u Bah Luistar Lyngdoh kum u Acting Sirdar ka Elaka Nongpoh Sirdarship ban peit bad pynbit pynbiang ïa ki kam jong ka Elaka bad kyntu ruh ba baroh ki nongïalam jong ki Raid bapher bapher lem bad ki khun ki hajar ba kin ai ïa ka jingïatreilang ba pura na ka bynta ban pynïaid beit ïa ki kam synshar khadar jong ka Elaka.
