Shillong, Nohprah 19
Namar ka jingnang kiew jong ka jingpang HIV ha Meghalaya, u Myntri Rangbah ka Jylla, u Conrad K. Sangma u la pynbna ïa ka prokram “Mission Mode” kaba san snem – kaba shongdor T.25 klur ban ïakhun pyrshah ïa ka jingma ha ka jingkiew jong ka jingpang HIV/AIDS ha ka Jylla.
Ïa kane ka jingtyrwa la mynjur da ka Kynhun Myntri ka Jylla ha ka jingïalang (jong ka) ba khatduh jong une ka snem kaba la long ha ka Sngi Thohdieng.
“Ha ka rukom ba ngi la thaw ïa ka projek DREAM… ngi sngewthuh ba ïa ka jingma bad ka jingkiew ba shyrkhei jong ka jingpang HIV/AIDS ha ka Jylla jong ngi, ngi donkam ban wanrah ïa ka prokram ha ka rukom jong ka ‘Mission Mode’…na ka bynta ban pynduna ïa ka jingkiew kaba shyrkhei (baroh kawei) jong ka jingpang HIV/AIDS ha ka imlang-sahlang jong ngi,” ong u Sangma ha ki nongthoh khubor.
“Ka dei ka prokram ‘Mission Mode’ kaba san snem kaba la mynjur da ka Kynhun Myntri mynta ka sngi, ha kaba ka jingkheiñ kyllum bad ka jingmang pisa ka long T. 25 klur. Kata ka long kumba T.5 klur shisnem, ïa kaba yn pyndonkam na ka bynta ki jingtei, jingpynsngewthuh paidbah, ki jingïalap, bad ki kam bapher-bapher ki ban pynlong lyngba kane ka prokram,” u la ong.
U Sangma u la pynpaw ba ka rai jong ka Sorkar ka long katkum ka jingma jong ka jinglong-jingman da kaba ong, “Ka jingnang kiew ka dei ka bynta kaba ngi sngew ba ka long kaba ma bha.”
U la pynpaw ba ka jingkiew ka jingpang HIV ha ka Jylla ka la jur bha ha kine ki snem ba la leit.
“Ka jingdon jong kiba la heh la san kiba ïoh ïa ka jingpang HIV ha ka Jylla ka long 0.43% – kaba long shaba palat ïa ka ‘National Average’ kaba long 0.21%,” ong u Myntri Rangbah.
Haduh u snem 2024, u la ong ba kumba 9,589 ngut ki briew ki im bad u HIV bad kiba shah ktah thymmai ki dang bun, kumba 982 ngut ki nongpang man u snem.
